اسلام آباد( پاکستان پوائنٹ نیوز28۔مئی2018ء ) پاکستان نوں ایٹمی طاقت بنے 20ورھے بیت گئے، پاکستان ہن نیو کلیئر سپلائرز گروپ (این ایس جی) وچ رلتی ہون دا خاہشمند اے۔ تفصیل مطابق پاکستان دے ایٹمی تجربے نوں 20ورھے بیت گئے۔ ایس موقعے تے دفتر خارجا ولوں جاری بیان وچ آکھیا گیا اے کہ پاکستان نے پچھلے 20ورھیاں دوران ایٹمی عدم کھلار اُتے سختی نال عمل کیتا ۔
دفتر خارجا ولوں جاری بیان وچ آکھیا گیا کہ پاکستان نیو کلیئر سپلائر گروپ (این ایس جی) وچ رلتی ہون دا خاہشمند اے۔ ترجمان دفتر خارجا نے آکھیا کہ پاکستان دا ایٹمی پروگرام دفاعی مقصداں لئی اے تے 1998وچ سانوں اپنے دفاع لئی ایٹمی تجربے کرنے پئے۔ ترجمان دا کہنا سی کہ پاکستان کسے وی جارحیت دا چنگے طریقے نال جواب دین دی صلاحیت رکھدا اے۔ ساڈے کول جدید ترین ایٹمی ٹیکنالوجی موجود اے۔
ترجمان دفتر خارجا نے آکھیا کہ پاکستان 2050تیکر ایٹمی توانائی نال 40ہزار میگا واٹ بجلی پیداوار دے منصوبے اُتے عمل کر رہیا اے۔ چیتے رہوے کہ 11تے 13مئی 1998نوں بھارت نے راجستھان وچ پوکھران دے مقام اُتے ایٹمی دھماکے کر کے پہل کیتی تے ایہدے جواب وچ 28مئی 1998دی دوپہر پاکستان نے وی بلوچستان دے ضلع چاغی وچ ایٹمی دھماکے کر کے اپنے آپ نوں دنیا دی 7ویں ایٹمی طاقت وچ شامل کروا لیا سی۔ جیہدے مگروں ہر سال 28مئی تکبیر دیہاڑ (یوم تکبیر)دے طور اُتے منایا جاندا اے۔
