اسلام آباد( پاکستان پوائنٹ نیوز25۔مئی2018ء ) حکومت دی مدت ختم ہون وچ کُجھ دن ای باقی رہ گئے نیں پر وفاقی حکومت نے جاندے جاندے وفاقی ملازماں نوں نوازن دا فیصلا کر لیا۔ میڈیا رپورٹس مطابق وفاقی حکومت نے 6دن پہلاں وفاقی ملازماں لئی تن مہینے دی وادھو تنخاہ دا اعلان کیتا اے۔ وزیر اعظم شاہد خاقان عباسی ولوں ملازماں نوں اعزازی تنخاہواں دین دی منظوری دے دتی گئی اے۔
سارے وفاقی ملازماں لئی تن تنخاہواں دا اعلان اُچیچی (خاص)کارکردگی دے ناں اُتے کیتا گیا۔ جیہدا باقاعدہ نوٹی فکیشن وزیر اعظم دے پرنسپل سیکرٹری فواد حسن فواد نے جاری کیتا۔ نوٹی فکیشن وچ آکھیا گیا کہ وفاقی ملازماں نوں دتا جان والا اعزازیہ اوہناں دی بنیادی تنخاہ دے برابر ہوئے گا۔ نوٹی فکیشن مطابق اعزازے دا اطلاق صرف وفاقی سرکاری ملازماں اُتے ہوئے گا۔
