اسلام آ باد( پاکستان پوائنٹ نیوز25۔مئی2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار مبشر لقمان نے آکھیا کہ اک مخبری ایہ وی اے کہ نواز شریف اسحاق ڈار نوں اپنے آپ توں وکھ کر رہے نیں کیونکہ ممکنہ طور اُتے اسحاق ڈار نے اسٹیبلشمنٹ نال رابطے کیتے نیں۔ اوہناں نے اک مزار دے مجاور نال رلکے اسٹیبشلمنٹ نال رابطے کیتے تے وعدہ معاف گواہ بنن دی فیر آفر کیتی پر اوہ آفر رد کر دتی گئی۔
اسٹیبلشمنٹ نے اوہناں نوں آکھیا کہ ساڈے کول تہاڈے سارے کارنامے موجود نیں ایس لئی اسیں کسے نوں وعدہ معاف گواہ نہیں بنن دینا۔مبشر لقمان دا کہنا سی کہ اسحاق ڈار دے گھر نواز شریف دی اوہ دھی اے جیہنوں سعودی خاندان نے طلاق دے دتی تے اوہ ہن اسحاق ڈار دے گھر اے۔ ایہ لوکاں نوں نہیں پتا پر غالبن 23کمپنیاں، جیہناں دا اجے سبھ ساہمنے ذکر نہیں آیا، اوہ ایسے دھی اسما شریف دے ناں اُتے نیں جو اسحاق ڈار دے گھر اے۔
ایس لئی نازک موقعے تے نواز شریف اسحاق ڈار نوں ناراض وی نہیں کرنا چاہندے کیونکہ انج کرن نال معاملا بہت اگانہ چلا جائے گا۔ایس توں وکھ ر مبشر لقمان نے آکھیا کہ میری چڑیل نے خبر دتی اے کہ حسن نواز تے مریم نواز دی تیجی وار لڑائی ہو گئی اے۔ پہلی وار اوہناں دی لڑائی اودوں ہوئی جدوں اوہ لندن گئیاں سن تے ہن فون اُتے دوویں بھین بھراواں دی تیجی وار لڑائی ہوئی اے۔
اوہناں دا کہنا سی کہ حسن نواز نے مریم نواز نوں فون کر کے آکھیا اے کہ توں پورے خاندان دی میراث تے میرے والد دی سیاست نوں دفن کر دتا اے۔ تینوں لندن آنے دی کوئی لوڑ نہیں اے۔ ہاں جے تینوں کوئی خبر آ گئی تے توں سیاست چمکان لئی ضرور آ ئی۔ دوجے پاسے حسن نواز نے اپنے والد نال گل بات کردے ہوئے پاکستان آن توں صاف انکار کر دتا اے۔ حسن نواز دا کہنا اے کہ میری لندن وچ بہت چنگی زندگی لنگھ رہی اے۔ میں ایہناں مسئلیاں وچ نہیں پینا چاہندا۔ حسین نواز نے اپنے والد نوں آکھیا کہ میرا سیاست نال کوئی لینا دینا نہیں اے نہ ای میں پاکستان دا شہری آں تے نہ ای میں پاکستان وچ کوئی کاروبار کرنا اے۔ نہ ای میرے اُوتھے بیوی بچے نیں تے نہ میری کوئی جائیداد اے فیر میں کیوں پاکستان آواں؟
