اسلام آباد( پاکستان پوائنٹ نیوز24۔مئی2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار صابر شاکر نے دسیا کہ بہت گھٹ بیوروکریٹس نیں جو کوئی غلط کم ہون اُتے مزاحمت کردے نیں، ایہناں وچوں اک افسر اجیہا وی اے جیہنے نواز شریف دا استقبال کرن توں ا نکار کر دتا۔صابر شاکر دا کہنا سی کہ بہاولنگر وچ دو ایم پی ایز تے اک ایم این اے ارباں رُپئے دی زمین نوں کروڑاں رُپئے وچ لینا چاہندے سن پر ڈپٹی کمشنر نے مزاحمت کیتی۔
جدوں نواز شریف بہاولنگر گئے تے اوہناں نے نواز شریف دا استقبال کرن توں وی صاف انکار کر دتا۔ صابر شاکر نے آکھیا کہ ایہ بہادر بندہ ڈپٹی کمشنر بہاولنگر اظہر حیات اے۔ جیہنے نواز شریف نوں ریسیو کرن تے اوہناں دا استقبال کرن توں صاف انکار کرد تاسی۔ ہن اوہناں نوں دھمکیاں مل رہیاں نیں۔ ڈپٹی کمشنر دے انکار اُتے سارا انتظام سِدھا کمشنر نے سنبھالیا۔ تے اے ڈی سی جی سنے کُجھ ہور افسراں نوں ڈیوٹی اُتے تعینات کیتا۔اوہناں دا کہنا سی کہ ڈپٹی کمشنر اظہر حیات نے صاف آکھیا سی کہ ایہ نواز شریف دا نجی دورہ اے، نواز شریف دا نااہلی مگروں سٹیٹ افسر نال کوئی تعلق نہیں۔ ایس لئی اوہناں دی آمد تے استقبال وچ میرا کوئی کردار نہیں ہوئے گا نہ میں اوہناں نوں ریسیو کراں گا۔
