اسلام آباد( پاکستان پوائنٹ نیوز24۔مئی2018ء ) نگران وزیر اعظم دے عہدے لئی اجے تیکر حکومت تے اپوزیشن وچ معاملات چل رہے نیں۔ وزیر اعظم شاہد خاقان عباسی تے اپوزیشن لیڈر خورشید شاہ وچکار 5توں ودھ ملاقاتاں ہون مگروں وی اجے تیکر نگران وزیر اعظم دے ناں اُتے سانجھ نہیں ہو سکی۔ میڈیا رپورٹس مطابق نگران وزیر اعظم لئی پاکستان پیپلز پارٹی ولوں ذکا اشرف دا ناں اُتے اے تے پیپلز پارٹی وسیلیاں دا دعوا اے کہ وزیر اعظم شاہد خاقان عباسی ایس ناں نوں رد نہیں کر سکدے۔
پیپلز پارٹی وسیلیاں نے دعوا کیتا اے کہ حکومت جو وی کرے، نگران وزیر اعظم لئی پاکستان پیپلز پارٹی ولوں دتا گیا ناں ای فائنل ہوئے گا۔ وسیلیاں مطابق اپوزیشن لیڈر قومی اسمبلی سید خورشید شاہ نوں پارٹی قیادت نے ہدایت کیتی اے کہ اوہ ساڈے ولوں نگران وزیر اعظم دے عہدے لئی جو ناں دتے گئے نیں اوہناں وچ ذکا اشرف دا ناں اُتے رکھن۔دوجے پاسے پیپلز پارٹی دے وسیلیاں ولوں وی دعوا کیتا جا رہیا اے کہ وزیر اعظم شاہد خاقان عباسی ساڈے ولوں دتے گئے ناں نوں رد نہیں کر سکدے۔
چیتے رہوے کہ حکومتی جماعت مسلم لیگ (ن) نے آؤندے نگران سیٹ اپ لئی اپنے ناں وزیر اعظم شاہد خاقان عباسی نوں دے دتے نیں۔ ایہناں ناواں وچ جسٹس (ر) ناصر الملک، تصدق جیلانی تے عشرت حسین دا ناں شامل اے۔ مسلم لیگ (ن) دے وسیلیاں دا کہنا اے کہ ساڈے تِنوں ناں میرٹ اُتے پورے اُتردے نیں۔ نگران وزیراعظم لئی جیہڑے ناواں دا چناؤ کیتا گیا اے۔ ایہ تِنوں بندے نیک نامی تے چنگی شہرت رکھدے نیں۔
ایہناں بندیاں نے اپنے عہدیاں اُتے بڑی ایمانداری نال کم کیتا۔ایس توں وکھ تحریک انصاف نے وی نگران وزیر اعظم لئی جو ناں اپوزیشن لیڈر خورشید شاہ نوں دتے اوہناں وچ تصدق جیلانی تے عشرت حسین دا ناں شامل اے۔ ایس طرحاں مسلم لیگ (ن) تے تحریک انصاف دے ناواں وچ دو ناں سانجھے نیں ۔ ایہدے اُلٹ پیپلز پارٹی نے جیہڑے ناواں دا چناؤ کیتا اے اوہناں وچ ذکا اشرف، جلیل عباسی جیلانی تے ہور شامل نیں۔
