وزیر اعظم کرپشن وچ پھڑے گئے، اوہناں دیاں آف شور کمپنیاں دا انکشاف وی ہویا اے: عمران خان

اسلام آباد(پاکستان پوائنٹ نیوز۔24ستمبر 2016) چیئرمین تحریک انصاف عمران خان نے آکھیا اے کہ وزیر اعظم میاں نواز شریف کرپشن وچ پھڑے گئے نیں، ایتھوں تیکر کہ اوہناں دیاں آف شور کمپنیاں دا انکشاف وی ہو گیا اے۔ تفصیل دے مطابق ہفتے دے دیہاڑے اپنے ویڈیو پیغام وچ تحریک انصاف دے چیئرمین عمران خان دا کہنا سی کہ وزیر اعظم میاں محمد نواز شریف کرپشن وچ پھڑے گئے نیں تے اوہناں دیاں آف شور کمپنیاں دا انکشاف وی ہویا اے۔

اوہناں نے آکھیا کہ پاکستان ایس ویلے فیصلے دے مرحلے چوں لنگھ رہیا اے، سارے ریاستی اداریاں نوں آکھیا اے کہ انصاف دین، ایتھوں تیکر کہ پارلیمنٹ وچ وی پاناما لیکس دا معاملا چُکیا اے۔ اوہناں نے آکھیا کہ برطانوی وزیراعظم نے پاناما لیکس اُتے فوری اپنی صفائی دِتی تے آئس لینڈ دے وزیر اعظم نوں عوامی دباء پاروں استعفا دینا پیا۔ اوہناں نے آکھیا کہ نیب ، ایف بی آر تے الیکشن کمیشن نے نوٹس نہیں لِتا تے ساڈے کول صرف احتجاج دا آپشن باقی بچیا اے۔ عمران خان نے آکھیا کہ 30ستمبر نوں ملکی تواریخ دا سبھ توں وڈا احتجاج ہووے گا، ریاستی اداریاں اُتے دباء پا رہے آں کہ اوہ اپنا کم کرن۔ اوہناں نے آکھیا کہ تحریک انصاف کرپشن خلاف جہاد کر رہی اے۔