لاہور(پاکستان پوائنٹ نیوز۔24ستمبر 2016) پاکستان تحریک انصاف دے مرکزی رہنما و سابق گورنر پنجاب چودھری محمد سرور نے آکھیا اے کہ ڈنڈے تے گنڈاسیاں نال تحریک انصاف دے کارکناں نوں دھمکیاں دہشت گردی دے زمرے وچ آوندیاں نیں، لوکائی کرپشن خلاف اُٹھ کھلون۔ تفصیل دے مطابق ہفتے دے دیہاڑے پارٹی کارکناں نال گل بات کردے ہوئے چودھری محمد سرور دا کہنا سی کہ ملک ڈنڈے سوٹے دے کلچر دا متحمل نہیں ہو سکدا ،حالات نوں اینویں انارکی ول لیجان والے حکمران کسے صورت وی ملک و قوم دے خیر خواہ نہیں ہو سکدے۔
اوہناں نے آکھیا کہ لُٹی گئی دولت دی واپسی تیکر اسیں لُٹیریاں دا پِچھا کراں گے، اوہناں نے اکھیا کہ ایوان کرپٹ ٹولے نوں تحفظ نہیں دے سکدا، جہڑے لوکاں دے دامن اُتے کرپشن دے دھبے نیں اوہ کسے رعایت دے حق دار نہیں ۔ اوہناں نے آکھیا کہ تحریک انصاف تحریک احتساب مارچ کامیابی نال ہمکنار ہوکے رہوے گی تے لٹیریاں نوں قومی خزانے توں لُٹی گئی اک اک پائی دا حساب دینا پئے گا۔ اوہناں نے آکھیا کہ موجودا حکمراناں قوم نال جِنے وعدے وی کیتے اوہ سبھ جھوٹھے ثابت ہوئے، کشکول توڑن دا جھوٹھا وعدا وی ایہدے وچ ای شامل اے، غیر ملکی قرضیاں نے ملکی معیشت دا بیڑا غرق کر دِتا جہدا سود آن والیاں کئی نسلاں دیندیاں رہن گیاں۔ اوہناں نے آکھیا کہ لوکائی کرپشن خلاف اُٹھ کھلوئے۔
