لاہور( پاکستان پوائنٹ نیوز22۔مئی2018ء ) جسٹس اعجاز الاحسن دے گھر ہون والے مبینہ حملے دا ڈراپ سین ہو گیا اے۔ تفصیل مطابق سپریم کورٹ آف پاکستان دے جسٹس اعجاز الاحسن دے گھراُتے کُجھ ہفتے کُجھ نامعلوم بندیاں ولوں فائرنگ کیتی گئی سی۔ پر فائرنگ دے نتیجے وچ کوئی جانی نقصان نہیں ہویا سی۔ ہن ایس سارے معاملے دیاں تحقیقات کرن والی جے آئی ٹی نے اپنی رپورٹ مکمل کر لی اے۔
جے آئی ٹی ولوں تیار کیتی گئی مڈھلی رپورٹ وچ دعواکیتا گیا اے کہ فائرنگ دا معاملا سپریم کورٹ آف پاکستان دے جسٹس اعجاز الاحسن دے گھر اُتے کوئی سوچی سمجھی منصوبہ بندی نہیں سی۔ معاملے دیاں تحقیقات کرن والی جے آئی ٹی نے رپورٹ وچ ہور دسیا اے کہ جسٹس اعجاز الاحسن دے گھر اُتے ٹارگٹ کر کے گولیاں نہیں چلائیاں گئیاں۔ جے آئی ٹی نے جسٹس صاحب دے گھر دوالے لگے کیمریاں دی فوٹیج دا وی جائزہ لیا۔
جسٹس اعجاز الاحسن دے گھر ول دوویں گولیاں 9ایم ایم پستول نال چلائیاں گئیاں۔ گولیاں لبھن ملن مگروں آل دوال دے علاقیاں وچ پُن چھان کیتی گئی۔ گولیاں لبھن توں اک دن پہلاں اک کلو میٹر دور رات نوں ہوائی فائرنگ ہوئی سی۔ پولیس نے علاقے دے سرچ آپریشن دوران قبضے وچ لئے گئے پستول فارنزک لیبارٹری گھل دتے نیں۔ فرانزک لیبارٹری دی رپورٹ مگروں پتا لگے گا کہ فائرنگ کس پستول نال کیتی گئی۔ چیتے رہوے کہ جسٹس اعجاز الاحسن سپریم کورٹ دے اوس بنچ دا حصہ سن جیہنے سابق وزیر اعظم نوں نااہل قرار دین دا فیصلا دتا سی۔
