اسلام آباد( پاکستان پوائنٹ نیوز22۔مئی2018ء ) تحریک انصاف دے چیئرمین عمران خان نے آکھیا اے کہ نواز شریف 2سوالاں دے جواب دے دین تے معاملا حل ہو جائے گا، نواز شریف دسن کہ ایون فیلڈ اپارٹمنٹس کتھوں تے کیویں مُل لئے؟نواز شریف ایہ وی دسن کہ اوہناں دے بالاں دے 16اکاؤنٹس وچ 300ارب کتھوں آیا؟میڈیا رپورٹس مطابق چیئرمین تحریک انصاف عمران خان دی صدارت ہیٹھ پارٹی رہنماواں دا مشاورتی اجلاس ہویا۔
اجلاس وچ ملک دی چالو (موجودہ) صورتحال تے آؤندے الیکشن دے حوالے نال وچار وٹاندرا کیتا گیا۔ اجلاس وچ جہانگیر ترین، شاہ محمود قریشی، اسد عمر، فواد چودھری تے ہورنے رلت کیتی۔ عمران خان دی صدارت ہیٹھ ہون والے اجلاس وچ نگران وزیر اعظم چُنن لئی وی ناواں بارے گل بات کیتی گئی۔ پی ٹی آئی دا کہنا اے کہ نگران وزیر اعظم لئی پی ٹی آئی نے بہترین لوکاں دے ناں دتے نیں۔
پی ٹی آئی دے ناں چنگی شہرت رکھدے نیں۔ شاہ محمود قریشی نے نگران وزیر اعظم دے ناں بارے بریفنگ وی دتی۔تصدق جیلانی تے عشرت حسین بہترین ناں،ایہناں وچوں ای کسے نوں نگران وزیر اعظم لایا جانا چاہیدا۔ اجلاس وچ پارٹی دے 100دناں دے پروگرام دا جائزہ لیا گیا۔ اجلاس دوران شریف خاندان خلاف نیب کورٹ وچ سنوائی ہیٹھ مقدمیاں بارے غور کیتا گیا۔ تحریک انصاف دے چیئرمین عمران خان نے آکھیا اے کہ نواز شریف 2سوالاں دے جواب دے دین تے معاملا حل ہو جائے گا۔اوہناں دا کہنا سی کہ نواز شریف دسن کہ ایون فیلڈ اپارٹمنٹس کتھوں تے کیویں مُل لئے؟نواز شریف ایہ وی دسن کہ اوہناں دے بالاں دے 16اکاؤنٹس وچ 300ارب کتھوں آیا؟
