لاہور( پاکستان پوائنٹ نیوز22۔مئی2018ء ) پاکستان مسلم لیگ (ق) دے صدر و سابق وزیر اعظم چودھری شجاعت حسین تے سینئر مرکزی رہنما و سابق نائب وزیر اعظم چودھری پرویز الہی نال مسلم لیگ ضیاء دے سربراہ اعجاز الحق نے اوہناں دے گھر ملاقات کیتی۔ ملاقات دوران ملکی سیاسی صورتحال دے علاوہ مسلم لیگیاں دے اتحاد تے آؤندے الیکشن دے حوالے نال وچار وٹاندرا کیتا گیا۔
میڈیا رپورٹس مطابق ملاقات دوران چودھری شجاعت حسین وی موجود سن۔ ایس موقعے تے چودھری پرویز الہی نے آکھیا کہ مسلم لیگیاں دا اتحاد ضروری تے چنگی گل اے۔ آؤندے الیکشن وچ پاکستان مسلم لیگ بھرپور حصہ لوے گی ایس سلسلے وچ سیاسی و انتخابی سرگرمیاں دی شروعات کر دتی اے۔ اوہناں نے آکھیا کہ الیکشن کمیشن نوں صاف، شفاف تے غیر جانبدارانہ الیکشن کروان دے حوالے نال سیاسی جماعتاں نوں اعتماد وچ لینا چاہیدا۔
اوہناں نے آکھیا کہ نگران وزیراعظم انج دا ہونا چاہیدا جیہدے اُتے کسے سیاسی جماعت نوں اعتراض نہ ہوئے جدکہ نگران وزیر اعلا پنجاب دا غیر متنازعہ شخصیت ہونا بہت ضروری اے۔ اعجاز الحق نے چودھری برادران اُتے مسلم لیگیاں دے اتحاد بارے زور دتا۔ اوہناں نے آکھیا کہ آؤندے الیکشن نوں مُکھ رکھدے ہوئے مسلم لیگی دھڑیاں نوں اک پلیٹ فارم اُتے اکٹھے ہونا پئے گا۔
