پنجاب دی سیاست وچ وڈی ڈرامائی تبدیلی

لاہور(پاکستان پوائنٹ نیوز21۔مئی2018ء ) پنجاب دی سیاست وچ وڈی ڈرامائی تبدیلی،تحریک لبیک وڈا مذہبی ووٹ بنک لے کے کئی مذہبی سیاسی جماعتاں نوں پچھانہ چھڈ دیوے گی۔ تفصیل مطابق قومی اخبار دی اک رپورٹ مطابق دو سول خفیہ اداریاں سنے تن وکھو وکھ ایجنسیاں دی الیکشن دے حوالے نال رپورٹ وچ دسیا گیا اے کہ آؤندے الیکشن وچ مسلم لیگ (ن)پنجاب وچ تیجی، سندھ تے بلوچستان وچ 6ویں جدکہ خیبرپختونخوا وچ چوتھے نمبر اُتے اے۔

پنجاب وچ چالو (موجودہ) صورتحال وچ تحریک انصاف پہلے، آزاد امیدوار ددوجے، (ن) لیگ تیجے، پیپلز پارٹی چوتھے تے مسلم لیگ (ق) 5ویں نمبر اُتے اے۔ ایم ایم اے پنجاب توں مشکل نال دو سیٹاں کڈھ سکدی اے۔ جدکہ تحریک لبیک وڈا مذہبی ووٹ بنک لے کے کئی مذہبی سیاسی جماعتاں نوں پچھانہہ چھڈ دیوے گی۔ وکھو وکھ اداریاں دی رپورٹس وچ مسلم لیگ (ن) دی مقبولیت وچ کمی دی وجہ ختم نبوت قانون وچ ترمیم دی کوشش، نواز شریف دے اداریاں و ملک خلاف بیان تے احتساب عدالتاں وچ اوہناں دی کرپشن نوں ساہمنے آن نوں قرار دتا اے۔

رپورٹ مطابق ودھدی ہوئی لوڈشیڈنگ وی (ن) لیگ دی مقبولیت وچ کمی دی وجہ اے جدکہ مضبوط سیاسی دھڑیاں تے خانداناں دے پارٹی چھڈن نال وی (ن) لیگ تیجے نمبر دی جماعت بن گئی اے۔ پنجاب دے صرف تن ضلعیاں توں وکھ باقی سارے ضلعیاں وچ (ن) لیگ ٹُٹ بھج دا شکار اے۔ تے ایہناں تن ضلعیاں توں وی 31مئی مگروں کئی اہم ساتھی (ن) لیگ نوں چھڈ کے جا سکدے نیں۔ جنوبی پنجاب وچ کوئی وڈا سیاسی خاندان ،گروپ تے برادری (ن) لیگ نال نہیں رہی۔

جدکہ مذہبی ووٹ وی ایس وار (ن) لیگ دے مخالف جائے گا۔رپورٹ مطابق سندھ وچ پیپلز پارٹی پہلے، ایم کیو ایم تے پی ایس پی دوجے یاں تیجے نمبر اُتے ہون گیاں۔ جدکہ تحریک انصاف چوتھے، فنکشنل 5ویں تے (ن) لیگ 6ویں نمبر اُتے ہوگئی۔ ایسے طرحاں ایم کیو ایم وی کُجھ سیٹاں لے سکدی اے۔ کے پی کے وچ تحریک انصاف پہلے، اے این پی دوجے، ایم ایم اے تیجے، (ن) لیگ چوتھے جدکہ پیپلز پارٹی 5ویں نمبر اُتے ہو سکدی اے۔