اسلام آباد( پاکستان پوائنٹ نیوز21۔مئی2018ء ) پاکستان مسلم لیگ (ن) دے قائد و سابق وزیر اعظم نواز شریف نے احتساب عدالت ولوں پُچھے گئے 10سوالاں دے جواب دے دتے، نواز شریف جواب دین دوران جیب وچوں رومال کڈھ کے مُڑھکا صاف کردے رہے، عدالتی سوالنامے وچ پہلے 10سوال جے آئی ٹی دی تشکیل تے ایم ایل ایز بارے نیں۔ میڈیا رپورٹس مطابق احتساب عدالت نے سابق وزیر اعظم نواز شریف تے اوہناں دے خاندان توں 127سوال پُچھ لئے نیں جیہدا سوالنامہ شریف خاندان نوں دے دتا گیا اے۔
سوالنامہ 90صفحیاں دا اے۔ عدالتی سوالنامے وچ نواز شریف کولوں عوامی عہدیاں بارے وی سوال کیتا گیا اے۔ عدالت نے تِناں ملزماں توں کئی اِکو جیہے سوال وی پُچھے۔ عدالتی سوالنامے وچ پہلے 10سوال جے آئی ٹی دی تشکیل تے ایم ایل ایز بارے نیں۔ ایس موقعے تے عدالت وچ نواز شریف دے وکیل خواجا حارث سوالاں دے جواب دین وچ اوہناں دی مدد کردے رہے جدکہ نواز شریف جواب دین دوران جیب وچوں رومال کڈھ کے مُڑھکا صاف کردے رہے۔
عدالت وچ منی ٹریل بارے سوال اُتے نواز شریف نے جواب دتا کہ ایہ سوال حسن تے حسین نواز بارے اے پر ایس ویلے حسن تے حسین نواز عدالت ساہمنے موجود نہیں نیں۔ نواز شریف نے آکھیا کہ استغاثہ کول ایسے کوئی ثبوت نہیں جیہدے توں میرا لندن فلیٹ بارے تعلق ظاہر ہوئے۔ حدیبیہ پیپر ملز تے گلف سٹیل دے قیام وچ میرا کوئی کردار نہیں رہیا۔ نواز شریف نے آکھیا کہ میرے براہ راست علم وچ نہیں کہ گلف سٹیل دے قیام لئی فنڈ کتھوں آئے۔
سابق وزیراعظم نواز شریف نے اک سوال اُتے جواب دتا کہ طارق شفیع دے بیان حلفی توں ظاہر ہوندا اے کہ گلف سٹیل قرض دی رقم نال بنائی گئی۔طارق شفیع نوں ایس کیس وچ میں نہ تے ملزم نامزد کیتا نہ ای گواہ ۔ گلف سٹیل دے 25فیصد حصص دی فروخت دے سمجھوتے بارے ایم ایل دے پیش نہیں کیتا گیا۔ اوہناں نے آکھیا کہ 1980دے سمجھوتے اُتے شہباز شریف تے طارق شفیع دے دستخط توں انکار اُتے کُجھ نہیں آکھ سکدا۔
طارق شفیع تے شہباز شریف نے میری موجودگی وچ دستخطاں توں انکار کیتا۔ سابق وزیراعظم نواز شریف نے آکھیا ایہ اک حقیقت اے کہ 12اکتوبر1999نوں مینوں حراست وچ لے لیا گیا۔ اودوں مینوں گرفتار کر کے غیر قانونی حراست وچ رکھیا گیا جدکہ بعدوں مینوں سعودی عرب جلاوطن کر دتا گیا جتھوں میری 2007وچ واپسی ہوئی۔
