اسلام آباد(پاکستان پوائنٹ نیوز21۔ستمبر2016ء) چیئرمین تحریک انصاف عمران خان نے آکھیا اے کہ ایف آئی اے تے نیب دا پاناما لیکس دیاں تحقیقات توں انکار تشویش جوگ اے، ایس معاملے اُتے سپریم کورٹ نوں آپ نوٹس لینا چاہیدا، ادارے چوراں دی کرپشن بچان لئی بہانے لبھ رہے نیں، بھارت پاکستان خلاف الزام تراشی دی سیاست نہ کرے تے اوڑی حملے دے فوری بعد الزام لانا چنگی گل نہیں۔
تفصیل دے مطابق بدھ دے دیہاڑے سوشل میڈیا اُتے اپنے پیغام وچ عمران خان نے آکھیا کہ ایف آئی اے تے نیب دا پاناما لیکس دیاں تحقیقات توں انکار تشویش جوگ اے تے سپریم کورٹ پاناما لیکس معاملے دا نوٹس لووے۔ اوہناں نے آکھیا کہ ادارے چوراں نوں بچان لئی بہانے لبھ رہے نیں۔ عمران خان نے آکھیا کہ پاکستان وچ غریباں تے کمزوراں نوں جیل گھلیا جاندا اے۔
اوہناں نے اپنے پیغام وچ آکھیا کہ رکن ملک کشمیریاں نوں اوہناں دے حق دوان۔اوہناں نے آکھیا کہ بھارتی فوج معصوم بالاں تے سوانیاں نوں نشانا بنا رہی اے۔ عمران خان نے آکھیا کہ کشمیر وچ پیلٹ گن ورتنا عالمی کنونشنز دی خلاف ورزی اے، عالمی برادری مقبوضہ وادی وچ انسانی حقاں دیاں خلاف ورزیاں رکوائے۔ اوہناں نے آکھیا کہ کشمیر مسئلے اُتے موثر سفارتکاری دی لوڑ سی تے بھارت پاکستان خلاف الزاماں دی سیاست نہ کرے۔
