اسلام آ باد(پاکستان پوائنٹ نیوز19۔اپریل2018ء) چیئرمین نیب دا خواجا سعد رفیق خلاف کرپشن الزام اُتے انکوائری دا حکم، وزیر ریلوے اُتے مشیناں دی خریداری وچ ضابطے دی خلاف ورزی تے قیمتی زمین اونے پونے لیز اُتے دین دا الزام اے۔ میڈیا رپورٹس مطابق چیئرمین نیب دی صدارت ہیٹھ نیب بورڈ ایگزیکٹو دا اجلاس ہویا۔ اجلاس وچ کرپشن کیساں تے دائر ریفرنس وچ پیشرفت دا جائزہ لیا گیا۔
چیئرمین نیب نے پیپلز پارٹی دے رہنما سپیکر سندھ اسمبلی آغا سراج درانی خلاف انکوائری دا حکم دے دتا اے۔ آغا سراج درانی خلاف آمدن توں ودھ اثاثے بنان تے غیر قانونی بھرتیاں دا وی الزام اے۔ سیکرٹری سندھ اسمبلی خلاف وی انکوائری کیتی جائے گی۔ نیب نے وزیر ریلوے خواجا سعد رفیق دیاں شکایتاں دی پُن چھان دا حکم دے دتا اے۔ وزیر ریلوے اُتے مشیناں دی خریداری وچ ضابطے دی خلاف ورزی تے قیمتی زمین اونے پونے لیز اُتے دین دا الزام اے۔
ایس توں وکھ نیب نے سابق سیکرٹری لینڈ شاہ زرشمعون خلاف ریفرنس دائر کرن دا فیصلا کیتا اے ۔شاہ زر شمعون اُتے 530ایکڑ زمین دی غیر قانونی الاٹمنٹ دا الزام اے۔ شاہ زرشمعون نوں انٹرپول راہیں واپس لیاندا جائے گا۔ ایسے طرحاں نیب نے منظور قادر نوں وی واپس لیان لئی انٹرپول نوں خط لکھن دا فیصلا کر لیا اے۔
