پنجاب وچ 2 لکھ توں ودھ جعلی ڈاکٹر موجود نیں جو ہیپاٹائٹس وچ وادھے دی وجہ بن رہے نیں: سروے

فیصل آباد(پاکستان پوائنٹ نیوز16۔ستمبر2016ء) پنجاب ہیلتھ کمیشن دے تازا سروے دے مطابق صوبے بھر وچ 2 لکھ توں ودھ نیم حکیم موجود نیں جوعام لوکائی وچ ہیپاٹائٹس بی تے سی ورگے خطرناک روگاں دے ودھا وچ ودھ چڑھ کے حصہ لے رہے نیں۔ نیم حکیماں لئی سبھ توں محفوظ تھاں لاہور تے دوجا نمبر بہاولنگر دا اے۔ تفصیل دے مطابق پنجاب ہیلتھ کمیشن دے حالیا سروے دے مطابق صوبے بھر وچ دو لکھ توں ودھ جعلی ڈاکٹر کلینک کھولے بیٹھے نیں جو ہیپاٹائٹس بی تے سی ورگے خطرناک روگاں وچ وادھا کرن وچ رُجھے ہوئے نیں۔ سروے دے مطابق صوبے بھر وچ سبھ توں زیادا 50 ہزار جعلی کلینک لاہور ، 22 ہزار ضلع بہاولنگر، ضلع ملتان وچ 18 ہزار، ضلع رحیم یار خان وچ 10 ہزار توں ودھ اے۔