گوجرانوالا(پاکستان پوائنٹ نیوز22۔مارچ2018ء) گوجرانوالا وچ پائے گئے تاج دا کیہ کراں گے؟ عمران خان نے دس کے لوکاں دے دل جت لئے۔ عمران خان دا کہنا سی کہ اوہ سونے دا تاج شوکت خانم ہسپتال وچ جمع کروا دین گے۔ سونے دے تاج دا پیسہ غریباں دے علاج لئی خرچ کیتا جائے گا۔ تفصیل مطابق پاکستانی سیاسی کلچر وچ اپنے سیاسی رہنماواں نال محبت تے عقیدت دا اظہار کرن دا ہر کسے دا اپنا ای طریقہ اے۔
کوئی اپنے لیڈر دی آمد اُتے بھنگڑے پاندا اے تے کوئی خشی نال گانے گاؤندا اے۔ سیاسی رہنماواں نوں سونے دے تاج پان دا سلسلا شرجیل میمن توں شروع ہویا سی جو بعدوں مریم نواز تیکر اپڑیا جتھے (ن) لیگی کارکناں نے سابق وزیر اعظم دی دھی مریم نواز نوں 20تولے دا سونے دا تاج پایا تے ہن ایہ رواج تحریک انصاف وچ وی جڑھ پھڑ رہیا اے۔ پچھلے دیہاڑے ممبر سازی مہم دے سلسلے وچ عمران خان جدوں گوجرانوالا اپڑے تے اوہناں نوں نہ صرف 40تولے سونے دا تاج پوایا گیا بلکہ چاندی دا اک بلا وی تحفے وچ دتا گیا۔ ایس موقعے تے عمران خان نے شکریہ ادا کردے ہوئے آکھیا کہ سونے دا تاج شوکت خانم ہسپتال وچ جمع کروا دیواں گے۔ سونے دے تاج دا پیسہ غریباں دے علاج لئی خرچ کیتا جائے گا۔
