اسلام آباد(پاکستان پوائنٹ نیوز19۔مارچ2018ء) اسلام آباد ہائی کورٹ وچ سابق وزیر اعظم میاں نواز شریف دی تقریر چلان توں روکن بارے درخاست اُتے دوبارہ نوٹس جاری کر دتا گیا، اسلام آباد ہائی کورٹ نے فریقاں نوں 10دناں وچ جواب جمع کروان دا حکم دے دتا اے۔ میڈیا رپورٹس مطابق اسلام آباد ہائی کورٹ نے نواز شریف دیاں اداریاں خلاف تقریراں بارے فریقاں دے جواب نہ آن اُتے فیر نوٹس جاری کر دتا۔
اسلام آباد ہائی کورٹ نے 10دناں وچ جواب جمع کروان دا حکم دتااے۔عدالت نے سیکرٹری اطلاعات، پیمرا تے ہور اداریاں نوں جواب جمع کروان دے حکم دیندے ہوئے سنوائی 17اپریل تیکر ملتوی کر دتی اے۔ چیتے رہوے کہ عدالت وچ عدلیہ تے ہور اداریاں خلاف نواز شریف دے بیان روکن لئی درخاست جمع کروائی گئی سی۔ درخاست وچ بینتی کیتی گئی سی کہ میڈیا نوں نواز شریف دی تقریر چلان توں منع کیتا جائے۔
