لندن(پاکستان پوائنٹ نیوز12۔ستمبر2016ء) سابق صدر پرویز مشرف نے آکھیا اے کہ سیاسی جماعتاں نال این آر او زندگی دی سبھ توں وڈی غلطی سی، نائن الیون دے بعد پاکستان کَلا افغانستان اُتے حملے دی مخالفت نہیں کر سکدا سی، امریکا دا ساتھ دینا ویلے دی لوڑ سی۔ تفصیل دے مطابق اپنے اک انٹرویو وچ سابق صدر نے آکھیا اے کہ نائن الیون دے بعد دنیا وچ صورتحال اُکا ای بدل گئی سی۔
افغانستان اُتے حملے لئی پاکستان ائر بیس نہ وی دیندا تے بھارت امریکا نوں اپنے ائر بیس دین لئی تیار سی۔ اوہناں دا کہنا سی کہ بھارتی وزیر اعظم واجپائی تے من موہن سنگھ سامنے مسئلا کشمیر چُکیا۔ اوہناں نے آکھیا کہ لال مسجد آپریشن تے چیف جسٹس افتخار محمد چودھری نوں ہٹانا ٹھیک اقدام سی، 12 مئی دے کراچی دے واقعات نال میرا کوئی تعلق نہیں، ایہدے وچ سیاسی جماعتاں دے عسکری ونگ شامل سن۔
پرویز مشرف نے آکھیا کہ بے نظیر نوں پاکستان واپس لیان لئی امریکا دا وی بتھیرا پریشر سی پر بے نظیر بھٹو سمجھوتے دی خلاف ورزی کر کے پاکستان آ گئیاں۔ بے نظیر دے آن دے بعد سعودی عرب نے نواز شریف نوں پاکستان آن دی اجازت دین لئی دباء پایا۔ اوہناں دا کہنا سی کہ پہلے 3 ورھیاں وچ کالا باغ ڈیم دا فیصلا کر سکدا سی، ڈیم دی اُساری اُتے سانجھی رائے تے اتفاق لئی کراچی، سکھر تے حیدر آباد وی گیا پر بعد دے 5 ورھیاں وچ ایہ مسئلا حکومت بن جان پاروں حل نہ ہو سکیا۔ الطاف حسین بارے پُچھے گئے سوال بارے اوہناں دا کہنا سی کہ الطاف حسین نوں پارٹی چھڈ دینی چاہیدی، ہن اوہناں دا پاکستان دی سیاست وچ کوئی مستقبل نہیں۔
