اسلام آباد(پاکستان پوائنٹ نیوز10۔ستمبر2016ء) وزیر اعظم نواز شریف نے آکھیا اے کہ حکومت دا ترقی تے خشحالی دا ایجنڈا ملک نوں مسائل چوں کڈھ دیوے گا، حکومت نے توانائی دے شعبے وچ ارباں رُپئے دی سرمایا کاری کیتی اے، حکومت دیاں لَمے چِر لئی اقتصادی استحکام دیاں پالیسیاں پاروں عالمی مالیاتی منڈیاں دا پاکستان اُتے اعتماد ودھیا ، ٹیکس محصولات وچ نمایاں وادھا ہویا اے، زرمبادلا دے ذخائر 20 ارب ڈالر توں ودھ گئے نیں۔
تفصیل دے مطابق ہفتے دے دیہاڑے وزیر اعظم نواز شریف نال سینیٹ وچ قائد ایوان راجا ظفر الحق نے ملاقات کیتی، ملاقات دوران ملکی ترقی تے امن و امان دی صورتحال سنے موجودہ سیاسی صورتحال اُتے تفصیلی وچار وٹاندرا کیتا گیا۔ ایس موقع اُتے وزیر اعظم نواز شریف نے آکھیا کہ حکومت ترقیاتی ایجنڈے اُتے عمل کر رہی اے، پاک چین اقتصادی راہداری منصوبا ملک لئی گیم چینجر ثابت ہووے گا جدکہ اقتصادی راہداری منصوبے دے مکمل ہون نال خطے دی تقدیر بدل جائے گی۔
اوہناں نے آکھیا کہ توانائی دے جاری منصوبیاں دی تکمیل نال لوڈشیڈنگ دا خاتما ہووے گا، حکومت نے توانائی دے منصوبیاں اُتے ارباں رُپئے دی سرمایا کاری کیتی اے، جہناں دی تکمیل پاروں لوکاں نوں سستی بجلی دِتی جائے گی۔ اوہناں نے آکھیا کہ حکومت لوکائی دا معیار زندگی بہتر بنانا چاہندی اے۔ وزیر اعظم نے آکھیا کہ معاشی سرگرمیاں وچ وادھے نال روزگار دے موقعے پیدا ہون گے۔
وزیر اعظم نے آکھیا کہ ملک وچ امن و امان دی صورتحال وچ بہتری آئی اے جہدا براہ راست فائدہ تاجراں نوں ہویا ۔ اوہناں نے آکھیا کہ ٹیکس محصولات وچ نمایاں وادھا ہویا، عالمی مالیاتی منڈیاں دا پاکستان اُتے اعتماد ودھیا اے تے اعتماد وچ وادھے پاروں حکومت دے لَمے چِر لئی اقتصادی پالیسیاں دی کامیابی دا ثبوت اے۔ اوہناں نے ہور آکھیا کہ حکومت ملک وچ بجلی تے گیس دی کمی دور کرن لئی اقدامات کر رہی اے، گیس دے شعبے وچ اصلاحات پاروں معیشت مستحکم ہوئی جدکہ بجلی تے گیس دی پیداوار وچ وادھے نال اوہناں دیاں قیمتاں وچ وی کمی ہووے گی۔
