کوئٹہ(پاکستان پوائنٹ نیوز09۔ستمبر2016ء) بلوچستان دے وزیر تعلیم عبدالرحیم زیار توال نے انکشاف کیتا اے کہ بلوچستان دے 5 ہزار سکولاں وچ صرف اک کمرا تے اک اُستاد اے جدکہ اک ہزار اِنج دے ہائی تے مڈل سکول نیں جہناں وچ سائنس دیاں لیبارٹریاں تے سائنس دا کمرا نہیں، مڈل تے ہائی سکولاں دی گنتی گھٹ ہون پاروں بالاں دی سکول چھڈن دی شرح 60 فیصد توں زیادہ اے۔
ایہ گل وزیر تعلیم نے مقامی ہوٹل وچ اک سیمینار نال خطاب کردے ہوئے آکھی۔ وزیر تعلیم دا کہنا سی کہ اسیں تعلیم دے میدان وچ دنیا وچ سبھ توں پچھانہ آں۔ اوہناں نے آکھیا کہ بلوچستان وچ سکول جان دی عمر دے سارے بالاں دی سکول وچ نہ ہون دی اک وڈی وجہ غربت دے علاوہ اوتھوں دی کُھلی ڈھلی زمین اے۔ اوہناں دا کہنا سی کہ وسائل دی کمی پاروں بلوچستان وچ ہن تیکر 12 ہزار توں ودھ سکول تعمیر کیتے جا سکے نیں جہناں وچ زیادہ تر پرائمری سکول نیں۔
اوہناں دا کہنا سی کہ دور دے علاقیاں وچ مڈل تے ہائی سکولاں دی گنتی گھٹ ہون پاروں بالاں وچ سکول چھڈن دی شرح زیادہ اے۔ اوہناں نے آکھیا کہ پرائمری توں مڈل وچکار سکول چھڈن دی شرح 60 فیصد توں زیادہ جدکہ مڈل توں ہائی وچکار 45 فیصد اے۔ ایہ شرح شاید دنیا بھر توں زیادہ ہووے۔ بلوچستان وچ سکول جان دی عمر دے 13 لکھ بال سکولاں وچ نیں جدکہ 18 لکھ سکولاں باہر نیں۔ وزیر تعلیم نے دسیا کہ بلوچستان وچ 5 ہزار پرائمری سکول انج دے نیں جہناں وچ صرف اک کمرہ تے اک اُستاد اے۔ عبدالرحیم نے ایہ وی انکشاف کیتا کہ بلوچستان وچ 5 سکول انج دے سکول نیں جہناں وچ سائنس دیاں لیبارٹریاں نہیں جدکہ 5 سو اِنج دے مڈل سکول وی نیں جہناں وچ سائنس دا کمرہ نہیں۔
