سکھر(پاکستان پوائنٹ نیوز16۔فروری2018ء) سکھر پولیس دا کارنامہ ساہمنے آ گیا۔ قتل دا ملزم پھڑن دی بجائے بیوی تے نکے بال نوں پھڑ لیا۔ میڈیا رپورٹس مطابق سکھر وچ پولیس دا اک ہور انوکھا کارنامہ ساہمنے آیا اے۔ سکھر پولیس نے سوانی تے اوہدے تن ورھیاں دے پُتر نوں گرفتار کر لیا۔ پولیس نے قتل وچ ملوث ملزم نوں گرفتار کرن دی بجائے اوہدی بیوی تے اوہدے نِکے بال نوں گرفتار کر لیا۔
میڈیا ٹیم اپڑن مگروں بیوی تے اوہدے بال نوں لیٹرین وچ بند کر دتا گیا۔سوانی دا کہنا اے کہ خاوند اُتے قتل دا مقدمہ اے پر اوہنوں گرفتار کرن دی بجائے مینوں تے میرے تن ورھیاں دے بال نوں گرفتار کر لیا گیا اے۔ایس ایس پی سکھر نے ایس بارے گل بات کردے ہوئے آکھیا کہ قتل دی ایف آئی آر وچ سوانی دا ناں وی درج اے تے سوانی نوں جیل وچ نہیں بلکہ وومن پروٹیکشن سیل وچ رکھیا گیا اے۔ ایس ایس پی سکھر نے ایہ وی آکھیا کہ سوانی نے آپ تحفظ دین دی درخاست دتی سی۔
