لاہور(پاکستان پوائنٹ نیوز13۔فروری2018ء) پاکستان مسلم لیگ (ن) دے رہنماواں نے لودھراں دے ضمنی الیکشن دے نتیجے نوں آؤندے جنرل الیکشن دا ٹریلر قرار دیندے ہوئے آکھیا اے کہ عمران خان دی غلط فہمی سی اے ٹی ایم وچوں نوٹ نکلدے نیں ووٹ نہیں،جہانگیر ترین نے لوکائی نوں نہیں عمران خان نوں بلینک چیک دتا سی، پارٹی سربراہ نوں جہاز دین نال لوک مطمئن نہیں ہوندے، لودھراں وچ پیسہ ہار گیا تے خدمت جِت گئی۔
ایہناں خیالاں دا اظہار رہنماواں نے ضمنی الیکشن وچ لیگی امیدوار دی کامیابی اُتے اپنے بیان وچ کیتا۔ سماجی رابطے دی ویب سائٹ اُتے اپنے بیان وچ وفاقی وزیر ریلوے خواجا سعد رفیق نے آکھیا کہ لعنت ملامت دی گندی سیاست لودھراں دے واسیاں دے ووٹ ہیٹھ دفن ہو گئی اے۔ گالھ نہیں دلیل، سازش نہیں عمل، ظلم نہیں عدل، جھوٹھ نہیں سچ، دعوے نہیں خدمت، کم کم تے صرف کم مسلم لیگ (ن) دی حکومت دی پچھان اے۔ سعد رفیق نے آکھیا کہ چکوال مگروں لودھراں دا پیغام سن لوو، ووٹ دی حرمت نوں منو، اکثریت اُتے اقلیت دے فیصلے نہ ٹھونسو۔ اوہناں نے آکھیا کہ لعنت ملامت دی گندی سیاست لودھراں دے واسیاں دے ووٹ ہیٹھ دفن ہو گئی اے۔
