ٹیکسلا(پاکستان پوائنٹ نیوز10۔فروری2018ء) چودھری نثار علی خان نے آکھیا اے کہ کُجھ پارٹی معاملات توں دلبرداشتہ ہو کے اپنے آپ نوں سائیڈ تے کر لیا۔ تفصیل مطابق سابق وزیر داخلا چودھری نثار علی خان نے ٹیکسلا وچ میڈیا نال گل بات کردے ہوئے آکھیاکہ میں ہمیشہ نواز شریف ساہمنے پارٹی وچ کمی تے کوتاہی دی نشان کاری کیتی۔ میں نواز شریف نوں کُجھ مشورے دتے پر اوہناں اُتے کوئی خاص توجہ نہیں دتی گئی۔
اوہناں داکہنا سی کہ مینوں پارٹی وچ کُجھ معاملات اُتے تحفظات سن۔ پارٹی وچ کُجھ معاملات اُتے دلبرداشتہ ہوکے سائیڈ اُتے ہوگیا۔ چودھری نثار علی خان نے آکھیاکہ میں پارٹی ڈسپلن دی خلاف ورزی نہیں کیتی۔ اک سوال دے جواب وچ اوہناں دا کہنا سی کہ میں نواز شریف ہیٹھ کم کر سکنا واں پر بالاں ماتحت سیاست نہیں کر سکدا۔ اوہناں دا اک ہور سوال دے جواب وچ کہنا سی کہ وزیراعظم بنن دا فیصلا الیکشن مگروں ہوئے گا پر ایس معاملے اُتے میں منافقت نہیں کراں گا کہ میں مریم نواز دی قیادت وچ کم نہیں کر سکدا۔
ایس لئی میں مریم نواز ہیٹھ کم کرن توں صاف انکار کیتا اے۔ مسلم لیگ (ن) وچ میرا کردار نواز شریف دے ناقد دے طور اُتے رہیا اے۔ ڈان لیکس بارے سوال دے جواب وچ چودھری نثار علی خان نے آکھیا کہ ڈان لیکس سنجیدہ معاملا اے، جے ایہدے اُتے سی ای سی دی میٹنگ نہ بلائی گئی تے میں رپورٹ پبلک کر دیواں گا۔
