اسلام آباد(پاکستان پوائنٹ نیوز07۔ستمبر2016ء) وفاقی وزیر برائے منصوبا بندی و ترقی احسن اقبال نے پاک چین اقتصادی راہداری منصوبے (سی پیک) دے تحت پنجاب وچ باقی صوبیاں دے مقابلے وچ زیادہ سرمایا کاری دے تاثر نوں رَد کردے ہوئے ایہنوں منفی پروپیگنڈا قرار دے دِتا۔ نجی ٹی وی نوں دِتے گئے اک انٹرویو وچ احسن اقبال نے آکھیا کہ ایہ اک منفی پروپیگنڈا اے جو ایس منصوبے دے مخالف کھلار رہے نیں تے ایہدے وچ کوئی حقیقت نہیں اے۔
اوہناں نے آکھیا کہ 46 ارب ڈالر دے سی پیک منصوبے وچ 35 ارب ڈالر ملک وچ توانائی دے شعبے لئی رکھے گئے نیں تے اوہناں وچوں 35 ارب ڈالر سندھ دے صوبے لئی اے، جِتھے تقریبن 11 ارب ڈالر توں ودھ دی سرمایا کاری کیتی جائے گی۔ احسن اقبال دا کہنا سی کہ ایسے طرحاں دوجے نمبر اُتے بلوچستان دا حصہ اے جِتھے تقریبن 9 ارب ڈالر توانائی دے شعبے اُتے خرچ کیتے جان گے۔
وفاقی وزیر نے آکھیا کہ ایہ کہنا کہ پنجاب وچ زیادہ منصوبیاں اُتے کم جاری اے بلکل غلط ہووے گا، کیوں جے ایہناں منصوبیاں دا اک وڈا حصہ سندھ تے بلوچستان لئی مختص اے، ایس لئی سبھ توں زیادہ فائدہ وی بلوچستان نوں ای ہووے گا۔ وفاقی وزیر دا کہنا سی کہ ایس منصوبے اُتے اسیں سارے صوبیاں دیاں منتخب حکومتاں نال مسلسل رابطے وچ آں تے حال ای وچ پاک چین اقتصادی راہداری منصوبے دے اک اجلاس وچ آزاد کشمیر، خیبر پختونخوا، سندھ تے بلوچستان دے وزیر اعلا نے نہ صرف منصوبے دی حمایت کیتی، بلکہ اوہناں نے واضح طور اُتے آکھیا کہ اوہناں نوں ایس منصوبے اُتے کسے قسم دے تحفظات نہیں نیں۔
