لاہور(پاکستان پوائنٹ نیوز07۔ستمبر2016ء) ترجمان پنجاب حکومت زعیم قادری دی زبان ڈول گئی۔ تفصیل دے مطابق ترجمان پنجاب حکومت زعیم قادری دی زبان اوس ویلے ڈول گئی جدوں اوہ بدھ دے دیہاڑے پرچا کاراں نال گل بات کر رہے سن۔ ترجمان کولوں جدوں پرچا کاراں نے عمران خان دی نااہلی بارے سوال پُچھیا تے اوہناں نے آکھیا میاں نواز شریف نااہل ہو جان گے انشااللہ۔
میڈیا نال گل بات کردے ہوئے اوہناں دا ہور کہنا سی کہ میں شیخ رشید نہیں آں جو توتا فال کڈھ رہیا واں، فال کڈھن والے شیخ رشید دی اپنی سیاست جلدی ختم ہو جاوے گی۔ زعیم قادری دا کہنا سی کہ احتجاج کرن لئی رائے ونڈ جان والیاں دیاں لَتاں توڑن دے بیان اُتے اجے وی قائم آں۔ اوہناں نے آکھیا کہ رائے ونڈ جانا ساڈے بنیادی حقاں نوں پامال کرنا اے، ایہ کم اسیں مشرف نوں وی نہیں کرن دِتا سی۔ ترجمان نے آکھیا کہ عمران خان دی سیاست وی جلد ختم ہو جائے گی۔ اوہناں نے آکھیا کہ سیاست نوں سیاست ای رکھیا جائے کیوں جے ذاتیات اُتے آئے تے اوکڑاں ہون گیاں۔ اوہناں نے آکھیا کہ اسیں اپنے گھر دی حفاظت ہر صورت کراں گے۔
