وزیر اعظم نواز شریف دا چترال دا دورا،

کئی منصوبے شروع کرن دا اعلان مخالف روز مخالفانا بیان دے رہے نیں، دعا اے اللہ مخالفاں نوں وی پاکستان دی ترقی وچ حصہ پان دی توفیق دیوے: جلسے نال خطاب

وزیر اعظم نواز شریف دا چترال دا دورا،
کئی منصوبے شروع کرن دا اعلان مخالف روز مخالفانا بیان دے رہے نیں، دعا اے اللہ مخالفاں نوں وی پاکستان دی ترقی وچ حصہ پان دی توفیق دیوے: جلسے نال خطاب

چترال(پاکستان پوائنٹ نیوز07۔ستمبر2016ء) وزیر اعظم نواز شریف نے چترال دے دورے دے دوران مختلف منصوبیاں دا اعلان کر دِتا۔ تفصیل دے مطابق بدھ دے دیہاڑے وزیر اعظم نواز شریف چترال پہنچے جِتھے اوہناں نے عوامی جلسے نال خطاب کردے ہوئے آکھیا کہ مینوں چترال آکے خشی ہو رہی اے۔ پہلے جدوں وزیر اعظم ساں اودوں آیا تے ہُن وی وزیراعظم آں، تے اج وی ایتھے آیاواں۔

اوہناں نے آکھیا کہ مینوں خشی ہو رہی اے کہ چترال دے لوک ہُن اردو سمجھن تے بولن لگ گئے نیں۔ اوہناں دا کہنا سی کہ میں چترال دی لوکائی نوں ایتھے خشخبری سُنان آیا واں۔ وزیر اعظم نواز شریف نے چترال لئی بجلی دی نویں ٹرانسمیشن لائن وچھان، ہسپتال تے اک یونیورسٹی چترال وچ بنان دا اعلان کردے ہوئے آکھیا کہ یونیورسٹی بنن دے بعد چترال دے لوک وی لاہور سنے ہور شہراں دے پڑھے لکھے لوکاں وچ شامل ہو جان گے۔

اوہناں دا کہنا سی کہ ایتھے اک نہیں بلکہ کئی یونیورسٹیاں بنن گیاں۔ اوہناں نے اعلان کیتا کہ 2017 دے آخیر تیکر لواری ٹنل وی مکمل کر لِتا جائے گا۔ مخالفاں نوں تنقید دا نشانا بناندے ہوئے وزیر اعظم نواز شریف نے آکھیا کہ لوک ایتھے ووٹ منگن آوندے نیں ، 2016 وچ ووٹ منگن دا ویلا نہیں آیا۔ اوہناں دا کہنا سی کہ کل کراچی دی لوکائی نے وی انج دے لوکاں نوں جواب دے دِتا اے۔

وزیر اعظم نے آکھیا کہ جے کوئی تعاون نہیں لینا چاہندا تے فیروی اسیں تعاون لئی تیار آں، مخالف روز مخالفانا بیان دے رہے نیں، پر اسیں چترال دی لوکائی نوں کَلا نہیں چھڈاں گے۔ اوہناں نے آکھیا کہ میرا خاب اے کہ اسیں سارے رلکے پاکستای دی اُساری کر ئیے۔ اوہناں نے آکھیا کہ میں اج صرف لواری ٹنل ویکھن آیا واں، لواری ٹنل اُتے 27 ارب رُپئے خرچا آ رہیا اے تے ساڈی حکومت نے لواری ٹنل اُتے 10 ارب خرچ کیتے۔ اوہناں نے آکھیا کہ میں دعا کرنا واں کہ اللہ مخالفاں نوں وی پاکستان دی ترقی وچ حصہ پان دی توفیق دیوے۔