لاہور(پاکستان پوائنٹ نیوز30۔جنوری2018ء) چیئرمین بحریہ ٹاؤن ملک ریاض حسین نے سابق ایس ایس پی ملیر دے حوالے نال الزاماں اُتے چُپ توڑدے ہوئے آکھیا اے کہ راؤ انوار نے اک واروی میرا ذاتی جہاز نہیں ورتیا، نقیب اللہ قتل کیس دا فیصلا قانون مطابق ہونا چاہیدا۔ نقیب اللہ میرے پُتراں وانگ سی، نقیب اللہ دے قتل اُتے اونا ای دُکھ ہویا جِنا اوہدے ماں پیو نوں اے۔
اوہناں نے نقیب اللہ محسود دے ماں پیو دے ناں اپنے جاری پیغام وچ آکھیاکہ نجی رجُھاں(مصروفیات) تے علاج دی وجہ توں باہرلے ملک آں۔ اوہناں نے واضح کیتاکہ پچھلے اٹھ ورھیاں وچ میرے کول دو جہاز نیں۔ اٹھ سال وچ اک وار وی راؤ انوار نے میرا جہاز نہیں ورتیا۔ اوہناں نے آکھیاکہ اوہ غیر قانونی کم کردے نیں تے نہ ای غیر قانونی کم دی حمایت۔ملک ریاض دا کہنا سی کہ قانون حرکت وچ آگیا اے۔
نقیب اللہ قتل کیس دا فیصلا قانون مطابق ہونا چاہیدا۔ جو وی مجرم اے اوہنوں سزا ملنی چاہیدی۔ چیئرمین بحریہ ٹاؤن نے آکھیاکہ نقیب اللہ دے قتل اُتے بہت دُکھ ہویا اے۔ نقیب اللہ دے قتل اُتے اونا ای دُکھ ہویا جِنا اوہدے ماں پیو نوں اے۔ نقیب اللہ میرے پُتراں وانگ سی۔ نقیب اللہ دے گھر والیاں نال کھلوتا آں۔
