لاہور(پاکستان پوائنٹ نیوز06۔ستمبر2016ء) پاکستان تحریک انصاف دے مرکزی رہنما و سابق گورنر پنجاب چودھری محمد سرور نے الیکشن کمیشن نوں (ن) لیگ دا سیاسی مخالفاں خلاف ”انتقامی ہیڈ کوارٹر“ قرار دیندے ہوئے آکھیا اے کہ حکمران الیکشن کمیشن نوں سیاسی مخالفاں نوں میدان توں ہٹان لئی ورت رہے نیں، الیکشن کمیشن آئین تے قانون نہیں (ن) لیگی قیادت دی مرضی نال چل رہیا اے، حکمراناں دی کرپشن تے قوم نال جھوٹھ بولنا الیکشن کمیشن دے سوا پوری قوم نوں نظر آ رہیا اے۔
تفصیل دے مطابق منگل دے دیہاڑے فوٹریس سٹیڈیم لاہور وچ دفاع دیہاڑ دی تقریب وچ رلت دے بعدمیڈیا نال گل بات کردے ہوئے چودھری محمد سرور نے آکھیا کہ جنرل راحیل شریف دی قیادت و چ ملک دا دفاع اج وی محفوظ ہتھاں وچ اے تے 1965 دی جنگ وچ قربانیاں دین والیاں نوں قوم اج وی سلام پیش کردی اے۔ اوہناں نے آکھیا کہ پاکستان خلاف سازشاں کرن والے غیر ملکی طاقتاں نوں ہمیشہ مونہ دی کھانی پیندی اے۔
اک سوال دے جواب وچ چودھری محمد سرور نے آکھیا کہ اسیں پہلے دن توں آکھ رہے آں کہ الیکشن کمیشن دا ریموٹ کنٹرول حکمراناں دے ہتھاں وچ اے تے ہُن الیکشن کمیشن ایہ ثابت کردا اے کہ اوہ (ن) لیگ دا سیاسی مخالفاں خلاف انتقامی ہیڈ کوارٹر اے جہنوں (ن) لیگ اپنے سیاسی مخالفاں لئی ورت رہی اے۔ اوہناں نے آکھیا کہ پوری قوم جاندی اے کہ حکمران کرپشن ، ٹیکس چوری تے منی لانڈرنگ ورگے جرماں وچ ملوث نیں جے الیکشن کمیشن اوہناں نوں کلین چٹ دے رہیا اے تے ایس توں وڈی ملک تے قوم دی بدقسمتی نہیں ہو سکدی۔ اوہناں نے آکھیا کہ تحریک انصاف حکمراناں دے احتساب دے مطالبے توں اک اِنچ پچھانہ نہیں ہٹے گی۔
