اسلام آباد(پاکستان پوائنٹ نیوز22۔جنوری2018ء) قومی اسمبلی وچ اپوزیشن لیڈر سید خورشید شاہ نے آکھیا اے کہ چیف جسٹس دوجیاں نوں بہتر کرن دی بجائے اپنے ادارے نوں ٹھیک کرن، عدالتاں انصاف کرن لئی ہوندیاں نیں حکمرانی لئی نہیں، سپریم کورٹ تے ہائی کورٹ دے ججاں دی گنتی وچ وادھا کیتا جائے، آصف علی زرداری راؤ انوار دی سرپرستی نہیں کر رہے، بے گناہ بندہ شہید ہویا انصاف ملنا چاہیدا، راؤ انوار تحقیقات وچ پیش نہیں ہوئے تے جوڈیشل انکوائری ہوئے گی، عمران خان دے اعلان مگروں اوسے ویلے استعفے آ جانے چاہیدے سن۔
اوہ پیر نوں پارلیمنٹ ہاؤس دے باہر میڈیا نال گل بات کر رہے سن۔ اپوزیشن لیڈر نے آکھیا کہ عمران خان ولوں استعفیاں دے اعلان مگروں فوری استعفے آ جانے چاہیدے سن۔ لیڈر نے آکھ دتا تے اوسے ویلے استعفے آ جاندے چاہیدے سن، استعفے دے اعلان مگروں دناں دا انتظار نہیں کرنا چاہیدا سی، استعفیاں دی گل سسٹم نوں ڈسٹرب کرن لئی کیتی گئی، اسیں سسٹم ڈی ریل نہیں ہون دیواں گے۔
اوہناں نے آکھیاکہ تحریک انصاف نے 11کروڑ توں ودھ پارلیمنٹ توں تنخاہواں تے سہولتاں لئیاں۔ عمران خان نے وی 70توں 80لکھ رُپئے لئے اوہ واپس کرن۔ اوہناں دا کہنا سی کہ استعفیاں دے معاملے اُتے تحریک انصاف دے ڈبل سٹینڈرڈ نیں۔ تحریک انصاف دے ارکان پارلیمنٹ ولوں تے استعفے آ سکدے نیں پر وزیر اعلا خیبرپختونخوا ہوشیار نیں۔ خورشید شاہ نے آکھیا کہ نیب دے سدن اُتے کوئی پیش نہ ہویا تے نیب دے قانون دی آزمائش اے۔
قانون ساریاں لئی برابر ہونا چاہیدا۔ اوہناں نے آکھیا کہ ایس طرحاں ادارے ختم ہو جان گے، ادارہ نہیں چل سکے گا، ایہ اوہ دور نہیں کہ دوہرا معیار ہوئے۔اوہناں نے آکھیا کہ چیف جسٹس دوجیاں نوں بہتر کرن دی بجائے اپنے ادارے نوں ٹھیک کرن۔ عدالتاں کول 8لکھ کیس پنڈنگ نیں۔ اوہنوں وی گورننس ای آکھیا جاندا اے۔ پہلے اپنے ادارے نوں ٹھیک کرن فیر دوجیاں نوں وی ٹھیک کرن دی اجازت اے۔ اوہناں دا کہنا سی کہ عدالتاں انصاف کرن لئی ہوندیاں نیں حکمرانی لئی نیں۔
