ہری پور(پاکستان پوائنٹ نیوز20۔جنوری2018ء) مسلم لیگ (ن) دے صدر و سابق وزیر اعظم نواز شریف نے آکھیا اے کہ پہلے ای آکھیا سی ایہ جس تھالی وچ کھاندا اے اوہدے وچ تُھکدا اے، اسمبلی توں تنخاہ وی لیندا اے تے اوہدے اُتے لعنت وی گھلدا، ایسا سیاستدان منظور نہیں جو آکھے اوئے چیف سیکرٹری، اوئے آئی جی میں تینوں جیل گھلاں گا، انشاء اللہ تُسیں آپ جیل جاؤ گے، لاہوریاں نوں شاباش کہ اوہنوں اوقات وکھا دتی، اوہناں معزز ججاں نوں سلام جہناں نے اوہنوں صادق تے امین قرار دتا، ایہ ویکھو ایہ نواز شریف دی نااہلی خلاف عوامی ریفرنڈم اے، بے گھراں نوں گھر دین دا اعلان وی کردتا۔
اوہناں نے اج ہری پور وچ جلسے نال خطاب کردے ہوئے آکھیا کہ ہری پور دے واسیو تُسیں دل خش کر دتا۔ کوٹ مومن دے جلسے توں وی وڈا جلسہ اے۔ نواز شریف ہری پور دے لوکاں دے جذبے اُتے قربان اے۔ تہانوں نواز شریف کدی نہیں بُھلے گا۔تُسیں نواز شریف نال ہمیشہ پیار کیتا، نواز شریف زندگی بھر تہاڈے نال محبت کردا رہوے گا۔ بڑی خش سی کہ میں ایہ موٹروے ویکھاں۔
بڑے پیار تے محبت نال موٹروے بنوائی۔ جدوں ایہدا افتتاح ہو رہیا سی تے ساڈے وزیراعظم شاہد خاقان عباسی نے آکھیا کہ آؤ ہزارہ موٹروے دا افتتاح کرنا اے ، تُسیں میرے نال چلو۔ میں آکھیا کہ میں میردا دل تے بہت کردا اے کہ میں ہزارہ موٹروے دا معائنہ ضرور کراں پر میرا دل بہت دُکھی اے کہ میں اینے جذبے نال لوکائی دی خدمت کر رہیا سی صلہ نہیں دتا۔ نواز شریف نوں صرف اک اقامے اُتے نااہل کردتا گیا۔
لوک دسن کہ کیہ میں نااہل آں؟نواز شریف نااہل ہو گیا اے؟ اوہناں نے لوکائی توں فیصلا لیا کہ نااہلی والا فیصلا منظور یاں نامنظور؟ جہدے اُتے لوکائی نے نامنظور آکھیا۔اوہناں نے آکھیا کہ کاش ایتھے ویکھو!ایہ لوکائی دا ریفرنڈم اے۔ اوہناں نے آکھیا کہ نواں پاکستان بنان والے لاڈلے تُسیں سنو! لوکائی ایہ رائے رکھدی اے۔ تُسیں ہمیشہ الزام تے گالھاں دی سیاست کیتی اے۔ تہاڈے صوبے وچ جتھے تہاڈی حکومت اے ایہ تہاڈا صوبہ نہیں اے ایہ ساڈا صوبہ اے۔ اوئے لاڈلے صوبے وچ تہاڈی حکومت اے پر موٹروے نواز شریف بنا رہیا اے۔ ایہ لاڈلا آکھدا سی کہ اسیں بجلی دے کارخانے لاواں گے تے دوجے صوبیاں نوں بجلی دیواں گے۔
