کراچی(پاکستان پوائنٹ نیوز20۔جنوری2018ء) شارع فیصل اُتے فیصل بیس نیڑے مبینہ پولیس مقابلے وچ زخمی ہون والے جہڑے بندے نوں ڈاکو قرار دتا گیا اوہ عام شہری نکلیا۔ پولیس مطابق جمعے تے ہفتے دی وچکارلی رات شارع فیصل اُتے گشت اُتے موجود اہلکاراں نے مشتبہ گڈی نوں روکیا تے ملزماں نے فائرنگ کر دتی، فائرنگ دے بعد پولیس تے ملزماں وچکار فائرنگ دا وٹاندرا ہویا، اہلکاراں دی جوابی فائرنگ دے نتیجے وچ چار ملزم زخمی ہو گئے۔
پولیس مطابق زخمی ملزماں نوں جناح ہسپتال منتقل کیتا گیا جہناں وچوں اک ملزم ڈاڈھے زخماں کارن ہلاک ہو گیا، جہدی شناخت مقصود دے ناں توں ہوئی جدکہ ہور زخمی ملزماں وچ رؤف، بابر تے علی شامل نیں۔ پولیس مطابق ملزم شارع فیصل اُتے شہریاں توں لُٹ مار کر رہے سن ۔ملزم ائر پورٹ توں واپس آن والیاں نوں نشانہ بناندے سن ۔ ملزماں نے پچھلی رات ای ائر پورٹ توں آن والے شہری نوں لُٹیا سی۔
پولیس نے ساریاں تفصیلاں دسن مگروں ہن اپنا موقف بدل لیا اے۔ پولیس نے دسیا کہ مقابلے دوران فائرنگ نال اک شہری ہلاک تے اک زخمی ہویا اے جدکہ مقابلے دوران دو ملزم گرفتار کیتے گئے جہناں وچ علی تے بابر شامل نیں۔ پولیس مطابق ہلاک بندہ رکشے وچ سوار سی تے رکشا ڈرائیو عبدالرؤف فائرنگ نال زخمی ہویا۔ یا درہوے کہ 13جنوری نوں کراچی دے علاقے شاہ لطیف ٹاؤن وچ وی ایس ایس پی راؤ انوار نے پولیس مقابلے وچ چار دہشت گرداں دی ہلاکت دا دعوا کیتا سی جہناں وچ اک نقیب اللہ وی شامل سی ، جہدی موت خلاف وکھالے کیتے گئے۔
