لاہور(پاکستان پوائنٹ نیوز06۔جنوری2018ء) پیر آف سواگ شریف خواجا احمد حسن نے (ن) لیگ توں وکھ ہون دا اعلان کرد ے ہوئے آکھیا اے کہ اپنے پُتر محبوب الحسن نوں آؤندے الیکشن دوران میدان وچ لیان دا فیصلا کرلیا اے۔ سنی اتحاد کونسل دے میڈیا سیل مطابق خواجا احمد حسن نے (ن) لیگ توں وکھ ہون دا اعلان کردے ہوئے مطالبہ کیتا اے کہ ختم نبوت دے قانون وچ بدلی کرن والیاں نوں سزا دتی جائے۔
اوہناں دا کہنا سی کہ ہمیشہ (ن) دی حمایت کردے آئے آں پر ہُن انج نہیں کراں گے۔ خواجا حمید الدین سیالوی دے مطالبیاں دی حمایت کردے آں۔ 9جنو ری نوں پوری طاقت نال لاہور اپڑاں گے۔ نواز شریف تے شہباز شریف نے لکھاں عاشقان رسول تے امت مسلمہ دے مجرماں نوں اپنی گودی وچ بٹھا کے رکھیا اے۔ اوہناں دا کہنا سی کہ رانا ثناء اللہ توں استعفا نہ لِتا گیا تے حالات خراب ہون گے۔
حکومت ساڈی امن پسندی نوں کمزوری نہ سمجھے۔ ختم نبوت دے معاملے اُتے اوکڑاں وچ آں۔ مسلم لیگ (ن) جدوں تیکرملزماں نوں سزا نہیں دیوے گی اسیں سکون نال نہیں بہواں گے۔ اوہناں مطالبہ کیتا کہ راجا ظفر الحق کمیٹی دی رپورٹ ساہمنے لیاندی جائے۔ (ن) لیگ وچ موجود علماء و مشائخ (ن) لیگ نوں چھڈ کے اہلسنت ول آ جان ۔ اہلسنت پرامن اے تے پرامن رہندے ہوئے ملکی سلامتی تے بقاء لئی اپنا کردار ادا کردے رہواں گے۔
