لاہور(پاکستان پوائنٹ نیوز23۔دسمبر2017ء) مسلم لیگ (ن)دے باغی رہنما سید غوث علی شاہ نے پارٹی وچ واپس آن لئی صدر پاکستان بنن دی شرط رکھ دتی اے۔ تفصیل مطابق سید غوث علی شاہ نے لاہور دا دورہ کیتا ۔ دورے دوران اوہناں نے وزیر اعلا پنجاب نال ملاقات کردے ہوئے پارٹی وچ واپس آن لئی اپنی شرط بارے دسدے ہوئے آکھیا کہ آوئندے الیکشن وچ کامیابی دی صورت وچ مینوں صدر مملکت بنایا جائے۔
غوث علی شاہ دی ایس شرط نوں منن توں وزیر اعلا پنجاب شہباز شریف نے معذرت کر لئی تے ایس طرحاں غوث علی شاہ دا دورہ لاہور ناکام ہو گیا۔ دوجے پاسے پارٹی صدر نواز شریف نے وی غوث علی شاہ نوں ملاقات لئی ویلا نہیں دتا‘ جہدے مگروں مایوسی دا شکار غوث علی شاہ واپس پرت گئے۔ قومی اخبار وچ چھپن والی رپورٹ مطابق غوث علی شاہ نال ملاقات دوران شہباز شریف نے آکھیاکہ تُسیں ساڈے سینئر رہنماواں وچوں اک او، ساڈی خاہش اے کہ تُسیں وچ واپس پرت آؤ۔
جہدے جواب وچ غوث علی شاہ نے گِلہ کرنا شروع کر دتا،اوہناں شہباز شریف نوں آکھیاکہ میرے نال بڑی زیادتی ہوئی اے میں پارٹی تے نواز شریف لئی بڑیاں قربانیاں دتیاں نیں پر مسلم لیگ (ن) دی کامیابی مگروں ممنون حسین نوں صدر مملکت بنا دتا گیا جہدے اُتے میں دُکھی ہو یا۔ ہن وی ویلا اے جے مینوں ملک دا صدر بنا دتا جائے تے میں واپس پارٹی وچ آ سکدا آں۔ جہدے اُتے شہباز شریف نے معذرت کردے ہوئے آکھیا کہ ایہ مطالبہ مننا میرے وس دی گل نہیں اے۔
