اسلام آباد(پاکستان پوائنٹ نیوز22۔دسمبر2017ء) پاکستان دی بھارتی جاسوس کلبھوشن دی ماں تے بیوی لئی موثر سفارتکاری اُتے بھارت گھبرا گیا اے، پاکستان دے آکھن مگروں وی بھارت نے اجے تیکر کوئی جواب نہیں دتا۔ میڈیا رپورٹس مطابق ترجمان دفتر خارجا پاکستان نے اپنے بیان وچ آکھیا کہ انسانی ہمدردی دی بنیاد اُتے بھارتی جاسوس دی ماں تے بیوی نوں ملاقات دی اجازت دتی گئی۔
بھارت پاکستان دی مثبت سفارتکاری کارن گھبرا گیا اے۔ پاکستان نے بھارتی جاسوس دی ماں تے بیوی دا سفری شیڈول تے میڈیا کوریج دیاں تفصیلاں منگیاں پر پاکستان دے بار بار آکھن مگروں بھارت ولوں اجے تیکر کوئی جواب نہیں دتا گیا۔کلبھوشن دی ماں تے بیوی نال کہڑا بھارتی سفارتکار ملاقات دا حصہ ہوئے گا ایس بارے وی اجے تیکر نہیں دسیا گیا۔ کلبھوشن دی ماں تے بیوی دی فلائٹ تے سفری شیڈول بارے وی پاکستانی حکام نوں کُجھ نہیں دسیا گیا۔
ایسے طرحاں میڈیا کوریج بارے وی ایہو ای حال اے۔ ترجمان دفتر خارجا دا کہنا اے کہ پاکستان ولوں کُھلے دل دا وکھالا کرن دا بھارت ولوں جواب نہ آیا چنگی گل نہیں اے۔ یادرہوے کہ پاکستان دی آفر اُتے بھارتی جاسوس کلبھوشن نال اوہدی ماں تے بیوی دی 25دسمبر نوں ملاقات کرائی جائے گی۔
