لاہور(پاکستان پوائنٹ نیوز21۔دسمبر2017ء) پاکستان مسلم لیگ (ن) دے صدر و سابق وزیر اعظم نواز شریف نے آکھیا اے کہ احتساب نظر نہیں آ رہیا، ٹارگٹڈ احتساب قوم نوں کسے طرحاں قبول نہیں، جمہوریت دی مضبوطی لئی ہر طرحاں دی قربانی دین نوں تیار آں‘ 2018الیکشن دا سال اے، لوکائی تے کارکناں نال رابطیاں وچ تیزی لیاندی جائے۔ میڈیا رپورٹس مطابق وزیر اعظم شاہد خاقان عباسی اج اسلام آباد توں لاہور ائر پورٹ پہنچے تے وزیر اعلا پنجاب میاں شہباز شریف نے اوہناں دا استقبال کیتا۔
ائر پورٹ توں سِدھا وزیراعظم شاہد خاقان عباسی تے وزیراعلا پنجاب رائے ونڈ جاتی امراء گئے، جتھے شاہد خاقان عباسی تے شہباز شریف نے مسلم لیگ (ن) دے قائد میاں نواز شریف نال ملاقات کیتی۔ ملاقات دوران ملک دی سیاسی صورتحال تے ملک اندر جاری ترقیاتی منصوبیاں بارے وچار وٹاندرا کیتا گیا۔ ملاقات دوران وفاقی وزیر خرم دستگیر، اورنگزیب، رانا تنویر تے انوشہ رحمان سنے ہور رلتی سن۔
ایس موقعے تے فاٹا اصلاحات دا تفصیلی جائزہ لیا گیا۔ وزیر اعظم شاہد خاقان عباسی نے نواز شریف نوں فاٹا سپریم کونسل جرگے نال ملاقات اُتے وی بریفنگ دتی۔ ملاقات دوران شہباز شریف نوں وزیراعظم دا امیدوار متھے جان ،نواز شریف دے کوٹ مومن جلسے، عوامی رابطہ مہم تیز کرن تے سندھ وچ ووٹ بنک ودھان بارے وچار وٹاندرا کیتا گیا۔ سابق وزیر اعظم نواز شریف نے ہدایت کیتی اے کہ 2018الیکشن دا سال اے۔
پارٹی رہنما لوکائی تے کارکناں نال رابطیاں وچ تیزی لیان۔ جمہوریت دی مضبوطی لئی ہر طرحاں دی قربانی دین نوں تیار آں۔ اوہناں نے آکھیا کہ ٹارگٹڈ احتساب قوم نوں کسے صورت قبول نہیں۔ ایس موقعے تے وزیر اعظم شاہد خاقان عباسی نے آکھیاکہ (ن) لیگ آن والا الیکشن نواز شریف دی قیادت وچ لڑے گی۔ (ن) لیگ نواز شریف دی قیادت وچ اک اے۔
