اسلام آباد(پاکستان پوائنٹ نیوز13۔دسمبر2017ء) جمعیت علماء اسلام (ف) دے سربراہ مولانا فضل الرحمن نے آکھیا اے کہ فاٹا سپریم کونسل دے مطالبے دی حمایت کرنا واں، پارلیمنٹ نوں جبر لئی ورتیا جا سکدا، دھرنیاں تے احتجاج کارن آئے دن حکومت اُتے دباء پایا جا رہیا اے، جبر تے دھرنیاں دی صلاحیت جمعیت کول وی اے، اسیں انج نہیں کرنا چاہندے۔ اوہناں نے اج فاٹا ریفارمز تے فاٹا نوں خیبرپختونخوا وچ ضم کرن دے حوالے نال پریس کانفرنس کردے ہو ئے دسیا کہ فاٹا بارے بل وچ فنی کمزوری اے۔
قومی اسمبلی وچ فنی کمزوری کارن بل نوں ایجنڈے دی کارروائی توں حذف کرنا پیا۔ مولانا فضل الرحمن نے آکھیا کہ فاٹا دے مسئلے اُتے رولا پایا گیا جدکہ حکومت نوں وضاحت دی اجازت وی نہیں دتی گئی۔ اوہناں نے آکھیا کہ آئین دے آرٹیکل 175دے تحت ہر صوبے دا اپنا ہائی کورٹ اے۔ اوہناں نے آکھیا کہ فاٹا دے مسئلے نوں سنجیدگی نال حل کرنا چاہندے آں۔ فاٹا دا لوکائی دی رائے مطابق حل چاہندے آں۔
فاٹا اندر صوبے تے پرانا نظام جاری رکھن دی وی تحریک موجود اے۔ اوہناں نے آکھیا کہ پارلیمنٹ لوکائی دے دلاں دی نمائندگی و ترجمانی کردی اے۔ پارلیمنٹ نوں جبر لئی نہیں ورتیا جا سکدا۔ سیاسی پارٹیاں جمہوری قدراں نوں مُکھ رکھن۔ دھرنیاں تے احتجاج راہیں آئے دن حکومت اُتے دباء پایا جا رہیا اے۔ جمعیت علماء اسلام کول وی جبر دی صلاحیت موجود اے پر اسیں اِنج نہیں کرنا چاہندے۔ اوہناں نے آکھیا کہ فاٹا سپریم کونسل دے مطالبے دی حمایت کرنا واں۔ فاٹا دی سپریم کونسل نے اپیل کیتی اے کہ فاٹا دے مسئلے اُتے اوہناں نال گل بات کیتی جائے۔
