راولپنڈی(پاکستان پوائنٹ نیوز13۔دسمبر2017ء) چیف آف آرمی سٹاف جنرل قمر جاوید باجوہ نے آکھیا اے کہ فاٹا دی قسمت دا فیصلا لوکائی دیاں خاہشاں دے مطابق کیتا جائے گا، پاک فوج فاٹا نوں قومی دھارے وچ لیان دی حمایت کردی اے، فاٹا نوں لوکائی دیاں خاہشاں دے مطابق قومی دھارے وچ لیاندا جائے گا، قبائیلیاں دے موقف نوں قدر دی اکھ نال ویکھدے آں، فاٹا وچ دہشت گردی خلاف کامیابی بہادرقبائیلیاں دیاں قربانیاں نال ممکن ہوئی۔
آئی ایس پی آر مطابق آرمی چیف جنرل قمر جاوید باجوہ نال قبائلی عمائدین تے یوتھ جرگے دے وفد نے ملاقات کیتی۔ ملاقات دوران فاٹا نوں قومی دھارے وچ لیان بارے وچار وٹاندرا کیتا گیا۔ وفد نے پاک فوج نوں دہشت گردی خلاف جنگ وچ کامیابیاں تے فاٹا وچ ترقیاتی کماں دی تعریف کیتی۔ وفد نے فاٹا نوں قومی دھارے وچ لیان لئی پاک فوج دے کردار نوں سلاہیا۔
ایس موقعے تے آرمی چیف جنرل قمر جاوید باجوہ نے آکھیا کہ پاک فوج فاٹا نوں قومی دھارے وچ لیان دی حمایت کردی اے۔نوجوان فاٹا وچ امن تے ترقی لئی اپنا کردار جاری رکھن۔ اوہناں نے آکھیا کہ فاٹا وچ دہشت گردی خلاف کامیابی بہادر قبائیلیاں دیاں قربانیاں نال ممکن ہوئی۔ فاٹا دے مستقبل لئی قبائیلیاں دے موقف نوں قدر دی اکھ نال ویکھدے آں۔ آرمی چیف نے ہور آکھیا کہ فاٹا وچ استحکام آن نال امن ول ودھ رہے آں۔
