عبدالمعید میرا پُتر تے بیلی سی، نِکا پُتر وی پاک فوج وچ جان دا خاہشمند اے: والد عبدالمعید

لاہور(پاکستان پوائنٹ نیوز12۔دسمبر2017ء) شمالی وزیرستان وچ دہشت گرداں دی فائرنگ دے نتیجے وچ شہید ہون والے سکینڈ لیفٹیننٹ عبدالمعید دے والد نے آکھیااے کہ عبدالمعید میرا پُتر ای نہیں بلکہ میرا بیلی وی سی۔ اُردو پوائنٹ نال اُچیچی گل بات کردے ہوئے عبدالمعید دے والد نے آکھیا کہ میرے تن پُتر تے اک دھی اے۔ عبدالمعید ایہناں ساریاں وچوں وڈا سی۔ اوہ میرے نال اپنی ہر گل شیئر کردا سی۔ میری کئی وار اوہدے نال گل ہوندسی تے میں اوہدے کولوں دو لفظاں وچ ای پُچھدا سی کہ سبھ نارمل اے نا؟ جہدے جواب وچ اوہ آکھدا سی کہ ایتھے سب نارمل اے، تُسیں پریشان نہ ہوو۔ اوہناں نے دسیا کہ عبدالمعید بہت بہادر سی۔عبدالمعید دے والد دا کہنا سی کہ اُنج تے ہر انسان نے ای دنیا توں ٹُر جانا اے پر جس طریقے نال اوہ گیا اے اوہدے اُتے مینوں فخر اے۔ شہادت دی خاہش نبیاں تے صحابیاں نے وی کیتی۔ ایس لئی ساڈے لئی ایہ اعزاز وی اے، اوہ ساڈی بخشش دا وسیلا وی بنے گا۔ اوہناں نے دسیا کہ اوہنوں کوئی وی شعبہ پسند نہیں سی ۔ اوہ آکھدا سی کہ ملٹری وچ ڈسپلن اے تے میں ملٹری ای جوائن کرنی اے۔ عبدالمعید دے والد دا کہنا سی کہ عبدالمعید اک فرمانبردار تے ذہین پُتر سی۔