اسلام آباد(پاکستان پوائنٹ نیوز02۔دسمبر2017ء) نجی ٹی وی چینل دے پروگرام وچ گل بات کردے ہوئے مشہور پرچا کار حامد میر نے آکھیاکہ راولپنڈی اسلام آباد یونین آف جرنلسٹ احتجاج کر رہے نیں، اسیں نیشنل پریس کلب اسلام آباد دے باہر اک احتجاجی کیمپ لایا ہویا اے تے ایس کیمپ دا ناں سقوط میڈیا کیمپ اے۔ سقوط دا مطلب اے مقبوضہ۔ اوہناں دا کہنا سی کہ 25نومبر 2017سیاہ دن اے کیونکہ ایس دن پاکستان الیکٹرانک میڈیا ریگولیٹری اتھارٹی (پیمرا) نے پرویز مشرف نوں وی پچھانہ چھڈدے ہوئے دو ہتھ اگانہ جاکے الیکٹرانک میڈیا دے نال نال سوشل میڈیا اُتے وی پابندی لا دتی۔
پرویز مشرف نے 3نومبر 2007نوں صرف الیکٹرانک میڈیا اُتے پابندی لائی سی۔ پر پاکستان دی موجودہ جمہوری حکومت نے 25نومبر نوں الیکٹرانک تے سوشل میڈیا اُتے پابندی لائی۔ اسیں اوہدے خلاف احتجاج کر رہے آں۔ حامد میر دا کہنا سی کہ اجے تیکر پیمرا ولوں ایس اقدام دی کوئی پکی وجہ بیان نہیں کیتی جا سکدی۔ پیمرا نے آکھیا کہ سارے ٹی وی چینلز دھرنے والیاں خلاف آپریشن نوں اجیہی کوریج دے رہے سن کہ فساد کھلار ے۔
پر میں سمجھنا واں کہ الیکٹرانک میڈیا نے حکومت نال رلکے ایس سارے معاملے نوں مس ہینڈل کیتا اے۔ اوہناں دا کہنا سی کہ اج مسلم لیگ (ن) دی جمہوریت حکومت دے دور وچ میڈیا آزاد نہیں اے۔ دھرنے والے لاہوروں ٹُر کے راولپنڈی اپڑے تے اسیں بلیک آؤٹ کیتا کیونکہ سانوں ہدایتاں دتیاں گئیاں سن کہ کوریج نہ دتی جائے۔
