گوادر پاکستان تے پاکستان گوادر اے۔

گوادر(پاکستان پوائنٹ نیوز(01۔ستمبر2016ء) وزیر اعظم نواز شریف نے گوادر وچ ترقیاتی منصوبیاں دا جائزہ لِتا۔ گوادر وچ مختلف منصوبیاں دی افتتاحی تقریب نال خطاب کردے ہوئے وزیرا عظم نے آکھیا کہ گو ادر نوں اک بین الاقوامی شہر بندا ویکھ کے خشی ہوئی اے۔ اوہناں نے آکھیا کہ گوادر فری زون تے کمپلیکس دے ڈیزائن بہت خوبصورت نیں۔ وزیر اعظم نے آکھیا کہ گوادر سی پیک منصوبے دا اک اہم حصا اے۔

گوادر پاکستان تے پاکستان گوادر اے۔ اوہناں نے آکھیا کہ گوادر ملک دا سبھ توں وڈا خشحال شہر ہووے گا۔ وزیر اعظم نے آکھیا کہ گوادر وچ جلدی ای انٹرنیشنل ائر پورٹ وی بنایا جائے گا جِتھے گلف ملکاں دے علاوا یورپی ملکاں توں وی اُڈاناں اُڈن گیاں۔ اوہناں نے دسیا کہ گوادر وچ پین والے صاف پانی تے بجلی دی قیمت دے خاتمے لئی منصوبیاں اُتے کم جاری اے۔

اوہناں نے آکھیا کہ گوادر دے عالمی بندرگاہ ہون دے ڈیزائن نوں 1991 وچ ای منظور کر لِتا گیا سی۔ اوہناں ہور آکھیا کہ پاک چین اقتصادی راہداری وچ وی گوادر بندرگاہ نوں اہمیت اے، امید اے کہ ایہ سارے منصوبے ویلے سِر مکمل ہو جان گے۔ اوہناں دا کہنا سی کہ اسیں توانائی دیاں لوڑاں نوں آپ پورا کراں گے، گوادر پورے ملک نال جُڑیے گا تے گوادر وچ لگن والے منصوبیاں دی لاگت 50 ارب رُپئے اے، ایہناں منصوبیاں نال لوکاں دا فائدہ ہووے گا۔

اوہناں نے دسیا کہ گوادر موٹروے نہ صرف بلوچستان بلکہ پورے ملک دے ہور حصیاں نال وی جُڑے گی، گوادر وچ لگن والے منصوبیاں نال 50 ہزار لوکاں نوں روزگار ملے گا۔ وزیر اعظم نے آکھیاکہ گوادر وچ اک سٹیٹ آف دی آرٹ ہسپتال وی بنایا جائے گا۔ اوہناں نے آکھیا کہ گوادر وچ لگے منصوبیاں وچ چین دا وی اینا ای ہتھ اے جِنا پاکستان دا اے، سی پیک منصوبا بنن دے بعد ٹریفک گوادر توں ٹُر کے چین جائے گا تے فیر چین توں گوادر آئے گی۔