پاکستان خلاف نعرہ کسے صورت قبول نہیں۔

ترجمان پاک فوج چنگے تے مَندے طالبان دی تمیز ختم کیتی، حقانی نیٹ ورک سنے سارے دہشت گرداں خلاف بغیر فرق آپریشن جاری اے، آپریشن ضرب عضب دے دوران 537 جوان شہید ہوئے تے 2272 جوان زخمی ہوئے نیں: میڈیا بریفنگ

پاکستان خلاف نعرہ کسے صورت قبول نہیں۔
ترجمان پاک فوج چنگے تے مَندے طالبان دی تمیز ختم کیتی، حقانی نیٹ ورک سنے سارے دہشت گرداں خلاف بغیر فرق آپریشن جاری اے، آپریشن ضرب عضب دے دوران 537 جوان شہید ہوئے تے 2272 جوان زخمی ہوئے نیں: میڈیا بریفنگ

راولپنڈی (پاکستان پوائنٹ نیوز(01۔ستمبر2016ء) ڈی جی آئی ایس پی آر لیفٹیننٹ جنرل عاصم سلیم باجوہ نے آکھیا اے کہ پاکستان نوں شک دی اکھ نال ویکھن والے ساڈیاں قربانیاں وی یاد رکھن، پاکستان خلاف نعرے کسے صورت قبول نہیں، باہر بیٹھے بندے خلاف حکومت ایکشن لے رہی اے، جواناں نے قربانیاں دے کے شمالی وزیرستان نوں دہشت گرداں توں پاک کیتا، ملک وچ دہشت گردی خلاف زیرو ٹالرونس پائی جاندی اے، آپریشن ضرب عضب دا مقصد دہشت گردی دا مکمل خاتما اے، ایس لئی جِتھے وی لوڑ پئی کومبنگ آپریشن کتیا جائے گا، داعش دُنیا بھر وچ کِھلری ہوئی اے، داعش نے پاکستان وچ وی اپنے پیرے جمان دی کوشس کیتی پر پاکستانی معاشرے نے ایہنوں قبول نہیں کیتا، اک اک ہزار رُپئے دے بدلے پاکستان دے مختلف شہراں وچ داعش لئی وال چاکنگ کروائی گئی، داعش نے ٹی وی چینلاں اُتے حملے کیتے، افغانستان توں دہشت گرداں دی پاکستان وچ مداخلت روکن لئی پاک افغان بارڈز دے 18 کراسنگ پوائنٹ اُتے گیٹ لاواں گے، چنگے تے مَندے طالبان دی تمیز ختم کیتی، حقانی نیٹ ورک سنے سارے دہشت گرداں خلاف بغیر فرق آپریشن جاری اے، دہشت گردی خلاف جنگ وچ پاکستان 106 ارب ڈالر دی قیمت ادا کر چکیا اے، آپریشن ضرب عضب وچ ہن تیکر 3500 دہشت گرداں نوں ہلاک کیتا گیا، آپریشن دے نتیجے وچ 56 فیصد متاثرین اپنے گھراں نوں چلے گئے نیں، بھارت دی بلوچستان وچ مداخلت ثابت ہو گئی اے، گرفتار بھارتی جاسوس کلبھوشن یادیو توں کیتیاں جان والیاں تحقیقات دے نتیجے وچ ”را“ دا پورا نیٹ ورک پھڑیا گیا اے، بھارتی وزیر اعظم نے بلوچستان بارے بیان دِتا تے پوری دنیا نے اوہدے اُتے ردعمل وی ویکھ لیا۔

تفصیل دے مطابق جمعرات دے دیہاڑے پاک فوج دے ترجمان عاصم سلیم باجوہ نے میڈیا نوں لَمی بریفنگ دیندے ہوئے آکھیا کہ 2014 وچ ضرب عضب آپریشن شروع کیتا گیا، دہشت گرداں دی بربریت تے ظلم ویکھ کے آپریشن ضرب عضب دا فیصلا ہویا، آپریشن ضرب عضب دا مقصد دہشت گردی دا مکمل خاتما اے۔عاصم سلیم باجوہ نے آکھیا کہ فیصلا ہویا کہ آپریشن ضرب عضب وچ انسانی حقاں دا خیال رکھیا جائے گا، ضرب عضب شمالی وزیرستان دہشت گردی دا مرکز سی جتھے آپریشن کرن لئی سبھ توں پہلے سارے فریقاں نوں اعتماد وچ لِتا گیا تے آپریشن شروع ہوندے ای بہت سارے دہشت گرد وزیرستان توں نس کے خیبر ایجنسی وڑ گئے،تے خیبر ایجنسی وچ دہشت گرداں دا پِچھا کیتا گیا۔

اوہناں نے آکھیا کہ آپریشن دے دوران اینا اسلحا گولا بارود برآمد ہویا کہ 21 سال تیکر اوہدے نال لڑیا جا سکدا اے۔ آپریشن دے دوران نفرت کھلارن والا مواد وی برآمد ہویا جدکہ خیبر ایجنسی وچ لُکے 900 دہشت گرداں نوں ہلاک کیتا گیا تے خیبر ایجنسی وچ دہشت گرداں دے نیٹ ورک دا خاتما کیتا تے اوکھے رستیاں والے علاقیاں وچ دہشت گرداں دے خفیا ٹھکانے ختم کر دِتے گئے۔

عاصم سلیم باجودہ دا کہنا سی سرحدی نظام دی بہتری لئی افغان سرحد اُتے 18 گیٹ بنائے جان گے تے سرحدی علاقیاں وچ پٹرولنگ نوں وی یقینی بنایا جائے گا، افغانستان دے نال جُڑیاں سرحداں نوں محفوظ بنان لئی موثر اقدامات کیتے جا رہے نیں، نقل مکانی کرن والے بندیاں نے بہت وڈی قربانی دِتی اے۔ اوہناں دا کہنا سی کہ متاثرین نوں چالو ورھے دے آخیر تیکر گھراں نوں واپس گھل دِتا جائے گا۔

اوہناں نے آکھیا کہ آپریشن ضرب عضب دے دوران 537 جوان شہید ہوئے تے 2272 جوان زخمی ہوئے نیں، آپریشن ضرب عضب دے دوران 3500 توں ودھدہشت گرداں نوں ہلاک کیتا گیا اے۔ اوہناں نے آکھیا کہ افغانستان تے پاکستان دے تعلقات آن والے دِناں وچ ہور بہتر ہون گے۔ افغانستان وچ دہشت گرداں دے کیمپ موجود نیں تے دہشت گردی خلاف افغانستان جِنا تعاون کرے اونا ای بہتر اے۔

اوہناں نے آکھیا کہ پاکستان وچ داعش نوں کِھلرن نہیں دیاں گے۔ داعش دی پاکستان وچ وڑن دی کوشش ناکام بناں دیاں گے تے داعش لئی چھاپے گئے مواد تے وال چاکنگ کرن والے بندیاں نوں وی گرفتار کیتا گیا اے۔ پاکستان وچ داعش دے ماسٹر مائنڈ نے کراچی تے حیدر آباد وچ پندرھاں بندیاں نوں قتل کیتا ۔ عاصم سلیم باجوہ نے آکھیا کہ کلبھوشن یادیو دی گرفتاری دے بعد اوہدے نیٹ ورک نوں وی پھڑیا اے تے اوہدی گرفتاری دے نتیجے وچ بھارتی مداخلت دے ہور ثبوت سامنے آئے نیں۔ اوہناں نے آکھیا کہ ملک وچ دہشت گردی نوں کسے وی صورت وچ برادشت نہیں کیتا جائے گا تے اپنی زمین کسے وی ملک خلاف ورتن نہیں دیاں گے۔