راجا ظفر الحق دی رپورٹ دے مندرجات ساہمنے آ گئے

اسلام آباد(پاکستان پوائنٹ نیوز27۔نومبر2017ء) حلف نامے وچ بدلی بارے راجا ظفر الحق دی رپورٹ دے مندرجات ساہمنے آ گئے نیں۔ تفصیل مطابق راجا ظفر الحق دی رپورٹ وچ آکھیا گیا اے کہ حلف نامے وچ تبدیلی دی تجویز انوشے رحمان نے پیش کیتی سی۔ انوشے رحمان نے دلیل دتی کہ حلف نامے دی تصدیق لئی اوتھ کمشنر کول جانا پیندا اے۔ ایس لئی حلف دی بجائے اقرار دا لفظ ورتیا جائے۔

پر 16رکنی انتخابی اصلاحات کمیٹی، جہدی سربراہی وفاقی وزیر قانون زاہد حامد کر رہے سن نے ایس تجویز دی مخالفت کیتی سی۔ پر انوشے رحمان نے موقف اختیار کیتا کہ ڈکٹیٹر دے دور وچ جو نومینیشن فارم بنایا جاندا اے اوہدے وچ تبدیلی ممکن اے۔ ایس لئی انتخابی اصلاحاتی ایکٹ وچ شامل کیتا جائے تاکہ آن والے ویلے وچ کوئی تبدیلی نہ کیتی جا سکے۔ جہدے مگروں آخیر ایس تجویز نوں من لیا گیا۔ یاد رہوے کہ ختم نبوتﷺ دے حلف نامے وچ تبدیلی بارے راجا ظفر الحق دی سربراہی وچ 34رکنی کمیٹی نے ایہ رپورٹ تیار کیتی سی۔