لاہور(پاکستان پوائنٹ نیوز07۔نومبر2017ء) محکمہ موسمیات دا کہنا اے کہ بارش دا کوئی امکان نہ ہون کارن پنجاب بھر وچ سموگ دی صورتحال برقرار رہن دی آس اے جدکہ بارش لیان دا نظام جہدے اگلے دو ہفتیاں وچ پیدا ہون دی امید کیتی جا رہی سی، صرف ملک دے اُتلے علاقیاں تے کشمیر تیکر محدود رہوے گا۔ محکمہ موسمیات دے مقامی ڈائریکٹر اجمل شاہ نے میڈیا نال گل بات کردے ہوئے آکھیا کہ ایہ صورتحال ستمبر تے اکتوبر دے خشک مہینیاں دی وجہ توں پیدا ہوئی جدکہ اوہناں نے پیشنگوئی کیتی اے کہ دسمبر دے مہینے وچ درجہ حرارت گھٹ ہون کارن سموگ دی تھاں دھند پے جائے گی۔
دوجے پاسے محکمہ موسمیات ولوں جاری اعلامیے وچ دسیا گیا کہ پنجاب وچ اگلے 48گھنٹیاں تک موسم خشک ہون دی وجہ توں سموگ تے دھند دی صورتحال برقرار رہوے گی۔ پنجاب دے محکمہ صحت دے ترجمان اخلاق احمد خان نے دعوا کیتا اے کہ سموگ دی صورتحال توں متاثر ہون والے روگیاں وچ ہن وادھا نہیں ہو رہیا۔ اوہناں دا کہنا سی کہ عام طور اُتے ایہ تصور کیتا جا رہیا سی کہ ایہدے نال ساہ تے اکھاں دے روگیاں وچ وادھا ہو سکدا اے پر صوبے دے ہسپتالاں وچ ایہدے متاثر روگیاں وچ وادھا نہیں ہویا۔
