ملتان(پاکستان پوائنٹ نیوز27۔اکتوبر2017ء) مسلم لیگ دے سربراہ شیخ رشید نے فوج نوں مخاطب کردے ہوئے آکھیا کہ فوج کولوں پُچھنا چاہنا واں کہ قومی سلامتی دے اجلاس وچ مجرم وزیر خزانہ نال کیویں بِہندے او؟جنرل باجوہ صاحب‘ نوید مختار صاحب تے جنرل زبیر صاحب تُسیں اجیہی نیشنل سکیورٹی کونسل دی میٹنگ وچ کیویں بِہندے او؟جہدے وچ فرد جرم لگن والا وزیر خزانہ بِہندا اے‘ نواز شریف نااہل اے‘ پر وزیر اوہدی ضمانت دیندے نیں، دسو فیر ایہ ملک کیویں زندہ رہ سکدا اے؟ اوہناں نے ملتان وچ عوامی جلسے نال خطاب کرد ے ہوئے آکھیا کہ سی پیک خلاف نہیں بلکہ سی پیک دا حامی آں ، اسیں وی پاکستان دی ترقی چاہندے آں۔
میٹرو ملتان چوری دا منصوبہ اے۔ چین وچ 200 کرپٹ بندیاں نوں گولیاں ماریاں گئیاں۔ ملتان میٹرو چوری کرن والیاں نوں وی گولیاں ماریاں جان گیاں۔ اوہناں دا کہنا سی کہ اوہ ویلا دور نہیں جدوں چوراں لئی زمین تنگ کر دتی جائے گی۔ شیخ رشید نے آکھیا کہ نواز شریف نے قریبی حلقیاں وچ آکھیا کہ مال شہباز شریف نے بنایا تے ناں میرا خراب کیتا گیا۔ اک نے آکھیاکہ روٹی کپڑا تے مکان دیواں گا پر قبرستان وی نہیں دتا۔ اک نے آکھیا کہ ملک نوں ٹائیگر بناواں گے،اوہناں نے اپنے بالاں نوں ٹائیگر بنا دتا۔
