اسلام آباد(پاکستان پوائنٹ نیوز27۔اگست 2016ء) پاکستان حکومت متحدہ قومی موومنٹ (ایم کیو ایم) دے قائد الطاف حسین خلاف تشدد اُتے اُکسان دے حوالے نال ثبوت آن والے ہفتے برطانوی پولیس دے حوالے کرے گی۔ اک عہدے دار نے نجی ٹی وی نوں دسیا کہ اسیں متحدہ دے قائد خلاف ثبوت اکٹھے کر رہے آں تے جلدی اوہدی تفصیل برطانوی حکام دے حوالے کیتی جاوے گی۔ اوہناں نے آکھیا کہ ایس گل نوں ثابت کرن لئی پکے ثبوت ہونے ضروری نیں کہ الطاف حسین دی تقریر نہ چلان دے نتیجے وچ میڈیا ہاؤسز اُتے حملے دیاں ہدایتاں جاری کیتیاں گئیاں۔
عہدے دار دا کہنا سی کہ برطانیا تے پاکستان وچکار ملزماں دی حوالگی دا سمجھوتا موجود نہیں تے ایس سمجھوتے دی راہ وچ پاکستان وچ موت دی سزا اُتے عمل درآمد سبھ توں وڈی رکاوٹ اے۔ اوہناں نے آکھیا کہ کراچی وچ میڈیا ہاؤسز اُتے حملے دے فوری بعد وزارت داخلا ولوں ایہ معاملا برطانوی سیکرٹری داخلا اگے رکھیا گیا تے برطانیا وچ پاکستانی ہائی کشمنر وی برطانوی پولیس نال رابطے وچ سن۔ عہدے دار نے دسیا کہ برطانوی حکام ایس معاملے وچ بتھیرا تعاون کر رہے نیں تے برطانوی وزیر اعظم ہاؤس نے میڈیا ہاؤسز اُتے حملیاں دی مذمت وی کیتی اے۔
