فیصل آباد(پاکستان پوائنٹ نیوز14۔اکتوبر2017ء) وزیر مملکت برائے پانی و بجلی عابد شیر علی نے آکھیا اے کہ اسیں عدالتاں دا احترام کردے آں تے کردے رہواں گے پر کُجھ لوکاں نوں چھڈ کے باقی سارے ججاں اُتے ریفرنسز نیں۔ میڈیا نال گل بات کرد ے ہوئے عابد شیر علی نے پرویز مشرف نوں پاکستانی معیشت دی خراب صورتحال دا زمے وار ٹھہراندے ہوئے آکھیا کہ 9سال پرویز مشرف تے 5سال پیپلز پارٹی دے دور وچ اک انچ دی ٹرانسمیشن لائن نہیں وچھائی گئی، نہ ای ملکی ترقی لئی کوئی منصوبہ لایا گیا۔
ساڈے دور وچ تن آپریشنز کیتے گئے۔عابد شیر علی دا کہنا سی کہ نواز شریف نے آکھیا کہ دہشت گردی خلاف جنگ وچ فورسز نوں وسائل دتے جان‘ اسیں سارے چیلنجاں مگروں اپنے جواناں نوں سپورٹ کراں گے۔ اوہناں دا کہنا سی کہ پاکستان کسے اک بندے یاں ادارے دا نہیں بلکہ 22کروڑ لوکائی دا اے۔ دہشت گرد کسے دا دوست نہیں‘ ملکی سالمیت لئی اپنیاں جاناں قربان کرن والیاں اُتے پاکستانیاں نوں فخر اے‘ سانوں اپنے جواناں اُتے فخر اے۔
اوہناں نے آکھیا کہ ایہ ویلا لڑائی دا نہیں بلکہ اگانہ ودھن دا اے۔ پہلیاں حکومتاں نے پاکستان وچ ترقی لئی کُجھ نہیں کیتا جہدی وجہ توں پاکستان اگانہ ودھن دی بجائے ہور پچھانہ چلا گیا پر مسلم لیگ (ن) دی حکومت عزم نال تاجراں تے صنعت کاراں دے مسئلے حل کر رہی اے۔اوہناں دا کہنا سی کہ (ن) لیگ احتساب کر رہی اے‘ این آر او سائن نہیں کر رہی۔
