لاہور(پاکستان پوائنٹ نیوز30۔ستمبر2017ء) سابق وزیر اعظم میاں نواز شریف نے آکھیا اے کہ 20کروڑ لوکاں دی جنگ لڑ رہیا واں‘ آخیر جِت جمہوریت دی ہوئے گی، سازش کرن والے چھیتی بے نقاب ہون گے ‘ جے ووٹ دا تقدس بحال ہو گیا تے اسیں سارے کامیاب ہو جاواں گے۔ جمعے دے دیہاڑے سابق وزیر اعظم میاں محمد نواز شریف نے لاہور دی اک مسجد وچ جمعہ پڑھن مگروں کارکنان نال گل بات کردے ہوئے آکھیا کہ میں اج 20کروڑ لوکاں دی جنگ لڑ رہیا واں جہدے وچ جمہوریت دی فتح ہوئے گی، کیونکہ (ن) لیگ اقتدار دی نہیں بلکہ اقدار دی سیاست کر دی اے۔
نواز شریف دا کہنا سی کہ (ن) لیگ دی محبت نوں لوکائی دے دلاں وچوں نہیں کڈھیا جا سکدا تے میں وی ایسے طرحاں قوم دے حقاں دی جنگ لڑدا رہواں گا۔ اوہناں نے آکھیا کہ جے ووٹ دا تقدس بحال ہو جائے تے اسیں سارے کامیاب ہو جاواں گے ۔ نواز شریف دا کہنا سی کہ چھیتی ای سازش کرن والے بے نقاب ہو جان گے۔ اک سوال دے جواب وچ میاں نواز شریف دا کہنا سی کہ سارے اداریاں دیاں سانجھیاں کوششاں نال ملک وچ امن قائم ہویا اے کیونکہ دہشت گردی دے خاتمے نال ملک وچ خشحالی آئے گی۔ ایس موقعے تے اوہناں نے لوکائی توں بیگم کلثوم نواز دی تندرستی لئی دعا کرن دی بینتی وی کیتی۔
