لاہور(پاکستان پوائنٹ نیوز19۔ستمبر2017ء) سابق وزیر اعظم نواز شریف نوں فیر قومی اسمبلی وچ لیان لئی مسلم لیگ (ن) کوششاں کر رہی اے‘ نواز شریف دی نااہلی دی سزا معاف کران لئی صدر مملکت نوں اپیل کیتی جائے گی۔ میڈیا رپورٹس مطابق سابق وزیر اعظم دی نااہلی دا مسئلا اجے تیکر حل نہیں ہو سکیا کہ نواز شریف نوں کِنے چِر لئی نااہل کیتا گیا اے۔ مسلم لگ (ن) نے ایس نقطے نوں سپریم کورٹ ساہمنے چُکن دا فیصلا کیتا اے۔
وزیر قانون نے نااہلی دی مدت نوں جانن لئی سپریم کورٹ توں رہنمائی لئی صدارتی ریفرنس دائر کرن دی تیاری وی شروع کر دتی اے۔ ریفرنس دائر کرن دا آخیری فیصلا شاہد خاقان عباسی دی ملک واپسی اُتے کیتا جائے گا۔ آئین دے آرٹیکل 186دے تحت صدر مملکت کسے وی آئینی معاملے اُتے عدالت عظمی توں رہنمائی لے سکدا اے جدکہ سابق وزیر اعظم دی نااہلی مگروں اجیہا ریفرنس دائر کرنا حکومتی حکمت عملی دا حصہ اے۔ سپریم کورٹ وچ ریفرنس دائر کرن دے نال نال نواز شریف دی نااہلی دی سزا معاف کران دی صدر مملکت توں اپیل کرن دی تجویز وی غور ہیٹھ اے۔
