لاہور(پاکستان پوائنٹ نیوز28۔اگست2017ء) نواز شریف دا ضمانت لے کے باہرلے ملک جان دا امکان اے۔ تفصیل مطا بق سابق وزیر اعظم نواز شریف نے لندن جان دا فیصلا کر لیا اے۔ نواز شریف بدھ والے دیہاڑ لندن جان گے جتھے اوہ عید اپنے گھر والیاں نال کرن گے جدکہ لندن وچ اوہ اپنی گھر والی کلثوم نواز دی عیادت کرن گے۔ ایس حوالے نال مشہور پرچا کار و تجزیا نگار ڈاکٹر شاہد مسعود ولوں دعوا کیتا گیا اے کہ نواز شریف قانونی معاملات طے کر کے ای لندن جان گے۔
نواز شریف نوں نیب ولوں گرفتار کیتے جان دا امکان اے ایس لئی اوہ نہیں چاہندے کہ اوہناں نوں مفرور قرار دتا جائے۔ نواز شریف لندن جان توں پہلاں اپنی ضمانت لے لین گے تاں جے اوہناں نوں گرفتار نہ کیتا جا سکے۔ لندن جان دی صورت وچ اوہناں اُتے ایہ الزام وی نہیں لگے کہ اوہ فرار ہو گئے نیں۔
