کراچی(پاکستان پوائنٹ نیوز24۔اگست2017ء) رینجرز سندھ نے متحدہ دے رہنما محمد یوسف عرف ٹھیلے والے نوں میڈیا ساہمنے پیش کر دتا جدکہ متحدہ لندن نے یوسف دی 7اگست نوں ہلاکت دی خبر چلان دے نال نال قل وی پڑھے۔ ترجمان رینجرز سندھ میجر قمبر رضا نے واضح کیتا اے کہ متحدہ لندن دی قیادت گمراہ کن پروپیگنڈا کر رہی اے۔ زندہ کارکن نوں مریا ظاہر کیتا گیا۔ میڈیا رپورٹس مطابق رینجرز سندھ ولوں میڈیا ساہمنے پیش کیتے گئے متحدہ لندن دے کارکن یوسف عرف ٹھیلے والے نے قبولیا کہ اوہ ایم کیو ایم لندن دا کارندہ اے۔
یوسف دا میڈیا ساہمنے کہنا سی کہ اوہ گلشن بہار دی کنسٹرکشن کمپنی وچ کم کردا اے۔ 27جولائی نوں چِٹے کپڑے پائے اہلکاراں نے جدوں گرفتاری لئی چھاپہ ماریا تے اوہ اوہناں نوں دوروں ویکھ کے فرار ہو گیا۔اوہدا کہنا سی کہ میں اپنے بیلی گھر لُک گیا۔ اوہ وی میرے توں تنگ آ گئے کہ اسیں پناہ دین اُتے پھڑے نہ جائیے۔ 7اگست نوں متحدہ لندن دے رہنما ندیم نصرت دی خبر پڑھی کہ یوسف عرف ٹھیلے والے نوں ہلاک کر دتا گیا اے۔
متحدہ لندن نے قل وی پڑھے۔یوسف دا کہنا سی کہ دوست دے گھر والیاں صورتحال توں تنگ آکے مینوں قانون نافذ کرن والے اداریاں دے حوالے کر دتا۔ ایس موقعے تے ترجمان رینجرز سندھ میجر قمبر نے دسیا کہ متحدہ لندن دے بہُتے دہشت گرد باہرلے ملک فرا ر ہو گئے نیں۔ متحدہ لندن دی قیادت گمراہ کن پروپیگنڈا کر رہی اے۔ اک زندہ بندے نوں مریا ہویا ظاہر کیتا گیا۔
